man

kis ne in āhinī-darvāzoñ ke paT khol diye

kis ne ḳhūñ-ḳhvār-darindoñ ko yahāñ chhoḌ diyā

kis ne āñchal pe mire Daal diye añgāre

Thiik se kaTne bhī na paayā thā tauq-e-gardan

abhī to sadiyoñ kā pāmāl thā merā ḳhirman

us pe in vahshī-luTeroñ ne siyahkāroñ ne

mere armānoñ ko tārāj kyā luuT liyā

mere māsūmoñ ko be-ḳhāna o barbād kiyā

merī bahuoñ se havas-ḳhānoñ ko ābād kiyā

jal gayā merā chaman luT gayā sab merī bahār

mere barbat meñ koī taar nahīñ ab sābit

merī chīḳhoñ meñ koī dard nahīñ ab baaqī

mere pyāro mirī chhātī se lipaTne vaalo

aag vo dil meñ lagī hai ki maiñ hī jāntī huuñ

yuuñ mirī kokh jalī hai ki maiñ hī jāntī huuñ

mere bachcho mirī nāmūs ke pahredāro

dekho nezoñ pe tumhāre haiñ ye kis kī lāsheñ

tum ne ḳhud luuT liyā apnī hī bahnoñ kā suhāg

maañg meñ jhoñk dī sindūr kī jagah tum ne aag

sharm se ab to huī jaatī hai gardan mirī ḳham

paanī paanī huā jaatā hai musavvir kā qalam

ye tirā bait-e-muqaddas tirī rif.at kā mazār

kis kī manhūs nigāhoñ kā banā aaj shikār

kyā hue mere vo mansūbe vo ḳhvāb-e-fardā

jal gayā merā chaman luT ga.ī sab merī bahār

mere barbat meñ koī taar nahīñ ab sābit

merī chīḳhoñ meñ koī dard nahīñ ab baaqī

kis ne in aahini-darwazon ke paT khol diye

kis ne KHun-KHwar-darindon ko yahan chhoD diya

kis ne aanchal pe mere Dal diye angare

Thik se kaTne bhi na paya tha tauq-e-gardan

abhi to sadiyon ka pamal tha mera KHirman

us pe in wahshi-luTeron ne siyahkaron ne

mere armanon ko taraj kya luT liya

mere masumon ko be-KHana o barbaad kiya

meri bahuon se hawas-KHanon ko aabaad kiya

jal gaya mera chaman luT gaya sab meri bahaar

mere barbat mein koi tar nahin ab sabit

meri chiKHon mein koi dard nahin ab baqi

mere pyaro meri chhati se lipaTne walo

aag wo dil mein lagi hai ki main hi jaanti hun

yun meri kokh jali hai ki main hi jaanti hun

mere bachcho meri namus ke pahredaro

dekho nezon pe tumhaare hain ye kis ki lashen

tum ne KHud luT liya apni hi bahnon ka suhag

mang mein jhonk di sindur ki jagah tum ne aag

sharm se ab to hui jati hai gardan meri KHam

pani pani hua jata hai musawwir ka qalam

ye tera bait-e-muqaddas teri rifat ka mazar

kis ki manhus nigahon ka bana aaj shikar

kya hue mere wo mansube wo KHwab-e-farda

jal gaya mera chaman luT gai sab meri bahaar

mere barbat mein koi tar nahin ab sabit

meri chiKHon mein koi dard nahin ab baqi