manawiyyat

sabhī banāvaT dimāġh kī hai

kashish tavāzun vajūd lahreñ

zehn kī mahfil meñ ārzūoñ kā ik samāñ hai

yahī jahāñ hai

shu.ūr kī sat.h par umaDtā havā gumāñ hai

jo ham ne sochā jo ham ne dekhā hai apne sar par vo āsmāñ hai

jo chaar jānib se añkh meñ aks Dāltā hai vahī jahāñ hai

kashish tavāzun vajūd lahreñ

ye kā.enātoñ kī īñTeñ haiñ

zehn se bāhar ye sab nahīñ haiñ

zehn se bāhar hai behad-o-be-kanār ma.adūmiyat kā manzar

kashish tavāzun vajūd lahreñ zehn ke safhāt se miTeñ to

gañvā hī deñ apnī ma.anaviyyat

sabhi banawaT dimagh ki hai

kashish tawazun wajud lahren

zehn ki mahfil mein aarzuon ka ek saman hai

yahi jahan hai

shuur ki sath par umaDta hawa guman hai

jo hum ne socha jo hum ne dekha hai apne sar par wo aasman hai

jo chaar jaanib se ankh mein aks Dalta hai wahi jahan hai

kashish tawazun wajud lahren

ye kaenaton ki inTen hain

zehn se bahar ye sab nahin hain

zehn se bahar hai behad-o-be-kanar madumiyat ka manzar

kashish tawazun wajud lahren zehn ke safhat se miTen to

ganwa hi den apni manawiyyat