mawara

kisī tasvīr meñ rañgoñ se ubhāre na ga.e

tere chehre ke dil-āvez gulābī haale

mere alfāz kā tarshā huā sañg-e-marmar

kaun se but meñ tire jism-e-javāñ ko Dhāle

terī nau-ḳhez javānī ke kuñvāre motī

jagmagāte rahe vijdān ke ā.īne meñ

ban ga.e rashk-e-chaman lāla-o-nargis kī tarah

daaġh aur zaḳhm the jitne bhī mire siine meñ

terī ḳhushbū se mahakne lagā gulshan gulshan

Dāliyāñ phūloñ kī jhuk kar tujhe kahtī haiñ salām

gardish-e-vaqt rukī jaatī hai tauba tauba

maiñ ne dekhā nahīñ tujh sā koī āhista-ḳhirām

ye tirā paikar-e-sad-rañg ye āhañg-e-jamāl

dekh kar tujh ko ḳhayāl aate haiñ kaise kaise

terā chehra hai ki taḳhlīq-e-mah-o-mahr kā raaz

terī āñkheñ haiñ ki asrār-e-do-ālam jaise

terī sūrat tirī ma.asūm o muqaddas sūrat

merī har soch ke ā.īne meñ lahrātī hai

haa.e vo sher ki mauzūñ na huā jo tā-umr

tū usī sher kī tafsīr banī jaatī hai

kisi taswir mein rangon se ubhaare na gae

tere chehre ke dil-awez gulabi haale

mere alfaz ka tarsha hua sang-e-marmar

kaun se but mein tere jism-e-jawan ko Dhaale

teri nau-KHez jawani ke kunware moti

jagmagate rahe wijdan ke aaine mein

ban gae rashk-e-chaman lala-o-nargis ki tarah

dagh aur zaKHm the jitne bhi mere sine mein

teri KHushbu se mahakne laga gulshan gulshan

Daliyan phulon ki jhuk kar tujhe kahti hain salam

gardish-e-waqt ruki jati hai tauba tauba

main ne dekha nahin tujh sa koi aahista-KHiram

ye tera paikar-e-sad-rang ye aahang-e-jamal

dekh kar tujh ko KHayal aate hain kaise kaise

tera chehra hai ki taKHliq-e-mah-o-mahr ka raaz

teri aankhen hain ki asrar-e-do-alam jaise

teri surat teri masum o muqaddas surat

meri har soch ke aaine mein lahraati hai

hae wo sher ki mauzun na hua jo ta-umr

tu usi sher ki tafsir bani jati hai