mazi

zindagī ke husn kā paiġhām thā paiġhām-e-shauq

dīda-e-hairāñ meñ raqsāñ thī mohabbat kī bahār

is hujūm-e-kashmakash se be-ḳhabar thī bazm-e-zauq

mujh ko thā sab nau-ba-nau rangīniyoñ par iḳhtiyār

jab sahar ke phūTte hī shaam kā thā intizār

ik hujūm-e-shauq se thā jab hamārā dil-gudāz

un dinoñ kab zindagī kī talḳhiyāñ thiiñ āshkār

kaif-zā thā do diloñ kī dhaḌkanoñ kā soz-o-sāz

vo bahār-e-dilnashīñ ḳhauf-e-ḳhizāñ se be-niyāz

chāñdnī shab sehn-e-gul jāñ-ḳhez naġhma-zāiyāñ

mad-bhare ḳhush-kun manāzir kaif-parvar dil-navāz

zindagī thī ek gaatī muskurātī dāstāñ

ranj-o-rāhat kī kashākash par hai kis ko iḳhtiyār

be-niyāz-e-īn-o-āñ hai garm-o-sard-e-rozgār

zindagi ke husn ka paigham tha paigham-e-shauq

dida-e-hairan mein raqsan thi mohabbat ki bahaar

is hujum-e-kashmakash se be-KHabar thi bazm-e-zauq

mujh ko tha sab nau-ba-nau ranginiyon par iKHtiyar

jab sahar ke phuTte hi sham ka tha intizar

ek hujum-e-shauq se tha jab hamara dil-gudaz

un dinon kab zindagi ki talKHiyan thin aashkar

kaif-za tha do dilon ki dhaDkanon ka soz-o-saz

wo bahaar-e-dilnashin KHauf-e-KHizan se be-niyaz

chandni shab sehn-e-gul jaan-KHez naghma-zaiyan

mad-bhare KHush-kun manazir kaif-parwar dil-nawaz

zindagi thi ek gati muskuraati dastan

ranj-o-rahat ki kashakash par hai kis ko iKHtiyar

be-niyaz-e-in-o-an hai garm-o-sard-e-rozgar