Made For Eachother

tumheñ kuchh ḳhabar hai

ki jab maiñ nahīñ thā to tab maiñ kahāñ thā

maiñ ik maas ban kar kisī saḳht ghere meñ jakḌā huā thā

maiñ ḳhūnīñ añdheroñ meñ luthḌā huā thā

nahīñ jāntā thā

ki maiñ huuñ kahāñ huuñ

nahīñ jāntā thā

ki tum ho kahāñ ho

tumheñ kuchh ḳhabar hai

koī shakl le kar maiñ janmā thā jis din

maiñ janmā nahīñ thā

khulī aañkh se kitne chehre dikhe the

khulī habs ke kāran vo chehra nahīñ thā

tumheñ kuchh ḳhabar hai

maiñ jis lamhe janmā gayā is jahāñ meñ

azaañ mere kānoñ meñ Daalī ga.ī thī

na jaane mujhe kyuuñ sunā.ī na dī thī

magar ek gambhīr DāḌhī chubhī thī

maiñ rone lagā thā

mujhe vo azaañ par sunā.ī na dī thī

tumheñ kuchh ḳhabar hai

ki jis lamhe janmī ga.iiñ tum jahāñ meñ

maiñ tum se bahut duur dasht-e-gumāñ meñ

yūñhī rote rote jo hañsne lagā thā

mirī vo hañsī kyā vahāñ aa rahī thī

tumheñ kuchh ḳhabar hai

kisī haath kī ek halkī sī dhap ne

rulāyā thā tum ko

mire kaan meñ tab azaañ aa rahī thī

tumhein kuchh KHabar hai

ki jab main nahin tha to tab main kahan tha

main ek mas ban kar kisi saKHt ghere mein jakDa hua tha

main KHunin andheron mein luthDa hua tha

nahin jaanta tha

ki main hun kahan hun

nahin jaanta tha

ki tum ho kahan ho

tumhein kuchh KHabar hai

koi shakl le kar main janma tha jis din

main janma nahin tha

khuli aankh se kitne chehre dikhe the

khuli habs ke karan wo chehra nahin tha

tumhein kuchh KHabar hai

main jis lamhe janma gaya is jahan mein

azan mere kanon mein Dali gai thi

na jaane mujhe kyun sunai na di thi

magar ek gambhir DaDhi chubhi thi

main rone laga tha

mujhe wo azan par sunai na di thi

tumhein kuchh KHabar hai

ki jis lamhe janmi gain tum jahan mein

main tum se bahut dur dasht-e-guman mein

yunhi rote rote jo hansne laga tha

meri wo hansi kya wahan aa rahi thi

tumhein kuchh KHabar hai

kisi hath ki ek halki si dhap ne

rulaya tha tum ko

mere kan mein tab azan aa rahi thi