madrase ka ek hi kamra

master jī bāhar ga.e haiñ

master jī ga.e zarā bāhar

ab nazar kyā rahe kitāboñ par

dil hī dil meñ haiñ saare laḌke shaad

goyā qaidī the ab hue āzād

ab kitābeñ kahāñ sabaq kis kā

paḌhnā-vaḌhnā ḳhayāl se khiskā

ek hañstā hai ek gaatā hai

aur ik chuTkiyāñ bajātā hai

ek baiThe hī baiThe sotā hai

aur ik jhūT-mūT rotā hai

mashvare kar rahe haiñ do bāham

aao chupke se uTh ke chal deñ ham

ek goshe meñ goliyāñ kheleñ

yā ground meñ chal ke DañD peleñ

copy ik jald jald bhartā hai

dūsrā us se naqal kartā hai

ghar se laa.e nahīñ haiñ kar ke savāl

master jī se ab kareñge chaal

ik ne bāñdhā hai gaal par rūmāl

taaki pūchheñ na is se koī savāl

daaḌh ke dard kā bahānā hai

chhuTTī lenī hai ghar ko jaanā hai

saath bāteñ bhī hotī jaatī haiñ

shoḳh ghāteñ bhī hotī jaatī haiñ

ek kahtā hai nazm yaad nahīñ

master sāhab aa na jaa.eñ kahīñ

yuuñ hī Tarḳhā.ūñgā suneñge jab

ātā-vātā mujhe nahīñ matlab

ma.anī mujh ko sujhāte jaanā tum

chupke chupke batāte jaanā tum

aur geograph chup are chup kar

miim alif siin maas Te re Tar

master jī ke aa jaane par

jhaT mil ga.ī sab ko ḳhabar

aise ishāre ho ga.e

ustād kā muñh dekh kar

chup chaap saare ho ga.e

ab is tarah ḳhāmosh haiñ

goyā kabhī bole na the

āñkheñ uThā.ī hī na thiiñ

aur lab kabhī khole na the

ab haiñ kitābeñ sāmne

bāham nigah miltī nahīñ

haiñ bhāgne vaale bhī chup

ab un ko rah miltī nahīñ

ab daaḌh bhī dukhtī nahīñ

ab dard saarā tham gayā

haañ haath hai lekin vahīñ

goyā vahīñ par jam gayā

chehre kitāboñ se chhupe

saarī zabāneñ chup huiiñ

chuTkī vahīñ par rah ga.ī

siiTī kī tāneñ chup huiiñ

ab copiyāñ kam ho ga.iiñ

ab naql chal saktī nahīñ

ustād se goyā koī

ab aql chal saktī nahīñ

ye nanhe munne se jo haiñ

shoḳhī meñ hazrat ek haiñ

sūrat to dekho aap kī

goyā bahut hī nek haiñ

dil meñ sharārat hai bharī

dam saadh rakkhe haiñ magar

dekho phir in kī shoḳhiyāñ

ustād phir jaa.e agar

master ji bahar gae hain

master ji gae zara bahar

ab nazar kya rahe kitabon par

dil hi dil mein hain sare laDke shad

goya qaidi the ab hue aazad

ab kitaben kahan sabaq kis ka

paDhna-waDhna KHayal se khiska

ek hansta hai ek gata hai

aur ek chuTkiyan bajata hai

ek baiThe hi baiThe sota hai

aur ek jhuT-muT rota hai

mashware kar rahe hain do baham

aao chupke se uTh ke chal den hum

ek goshe mein goliyan khelen

ya ground mein chal ke DanD pelen

copy ek jald jald bharta hai

dusra us se naqal karta hai

ghar se lae nahin hain kar ke sawal

master ji se ab karenge chaal

ek ne bandha hai gal par rumal

taki puchhen na is se koi sawal

daDh ke dard ka bahana hai

chhuTTi leni hai ghar ko jaana hai

sath baaten bhi hoti jati hain

shoKH ghaten bhi hoti jati hain

ek kahta hai nazm yaad nahin

master sahab aa na jaen kahin

yun hi TarKHaunga sunenge jab

aata-wata mujhe nahin matlab

mani mujh ko sujhate jaana tum

chupke chupke batate jaana tum

aur geograph chup are chup kar

mim alif sin mas Te re Tar

master ji ke aa jaane par

jhaT mil gai sab ko KHabar

aise ishaare ho gae

ustad ka munh dekh kar

chup chap sare ho gae

ab is tarah KHamosh hain

goya kabhi bole na the

aankhen uThai hi na thin

aur lab kabhi khole na the

ab hain kitaben samne

baham nigah milti nahin

hain bhagne wale bhi chup

ab un ko rah milti nahin

ab daDh bhi dukhti nahin

ab dard sara tham gaya

han hath hai lekin wahin

goya wahin par jam gaya

chehre kitabon se chhupe

sari zabanen chup huin

chuTki wahin par rah gai

siTi ki tanen chup huin

ab copiyan kam ho gain

ab naql chal sakti nahin

ustad se goya koi

ab aql chal sakti nahin

ye nanhe munne se jo hain

shoKHi mein hazrat ek hain

surat to dekho aap ki

goya bahut hi nek hain

dil mein shararat hai bhari

dam sadh rakkhe hain magar

dekho phir in ki shoKHiyan

ustad phir jae agar