magar ye zaKHm ye marham

tumhāre naam tumhāre nishāñ se be-sarokār

tumhārī yaad ke mausam guzarte jaate haiñ

bas ek manzar-e-be-hijr-o-visāl hai jis meñ

ham apne aap hī kuchh rañg bharte jaate haiñ

na vo nashāt-e-tasavvur ki lo tum aa hī ga.e

na zaḳhm-e-dil kī hai sozish koī jo sahnī ho

na koī va.ada-o-paimāñ kī shaam hai na sahar

na shauq kī hai koī dāstāñ jo kahnī ho

nahīñ jo mahmil-e-lailā-e-ārzū sar-e-rāh

to ab fazā meñ fazā ke sivā kuchh aur nahīñ

nahīñ jo mauj-e-sabā meñ koī shamīm-e-payām

to ab sabā meñ sabā ke sivā kuchh aur nahīñ

utaar de jo kināre pe ham ko kashtī-e-vahm

to gird-o-pesh ko girdāb hī samajhte haiñ

tumhāre rañg mahakte haiñ ḳhvāb meñ jab bhī

to ḳhvāb meñ bhī unheñ ḳhvāb hī samajhte haiñ

na koī zaḳhm na marham ki zindagī apnī

guzar rahī hai har ehsās ko gañvāne meñ

magar ye zaḳhm ye marham bhī kam nahīñ shāyad

ki ham haiñ ek zamīñ par aur ik zamāne meñ

tumhaare nam tumhaare nishan se be-sarokar

tumhaari yaad ke mausam guzarte jate hain

bas ek manzar-e-be-hijr-o-visal hai jis mein

hum apne aap hi kuchh rang bharte jate hain

na wo nashat-e-tasawwur ki lo tum aa hi gae

na zaKHm-e-dil ki hai sozish koi jo sahni ho

na koi wada-o-paiman ki sham hai na sahar

na shauq ki hai koi dastan jo kahni ho

nahin jo mahmil-e-laila-e-arzu sar-e-rah

to ab faza mein faza ke siwa kuchh aur nahin

nahin jo mauj-e-saba mein koi shamim-e-payam

to ab saba mein saba ke siwa kuchh aur nahin

utar de jo kinare pe hum ko kashti-e-wahm

to gird-o-pesh ko girdab hi samajhte hain

tumhaare rang mahakte hain KHwab mein jab bhi

to KHwab mein bhi unhen KHwab hi samajhte hain

na koi zaKHm na marham ki zindagi apni

guzar rahi hai har ehsas ko ganwane mein

magar ye zaKHm ye marham bhi kam nahin shayad

ki hum hain ek zamin par aur ek zamane mein