aah gandhi

tire mātam meñ shāmil haiñ zamīn o āsmāñ vaale

ahinsā ke pujārī sog meñ haiñ do jahāñ vaale

tirā armān puurā hogā ai amn-o-amāñ vaale

tire jhanDe ke nīche ā.eñge saare jahāñ vaale

mire būḌhe bahādur is buḌhāpe meñ javāñ-mardī

nishāñ golī ke siine par haiñ golī ke nishāñ vaale

nishāñ haiñ goliyoñ ke yā khile haiñ phuul siine par

usī ko maar Daalā jis ne sar ūñchā kiyā sab kā

na kyuuñ ġhairat se sar nīchā kareñ hindostāñ vaale

mire gāñdhī zamīñ vāloñ ne terī qadr jab kam kī

uThā kar le ga.e tujh ko zamīñ se āsmāñ vaale

zamīñ par jin kā mātam hai falak par dhuum hai un kī

zarā sī der meñ dekho kahāñ pahuñche kahāñ vaale

pahuñchtā dhuum se manzil pe apnā kārvāñ ab tak

agar dushman na hote kārvāñ ke kārvāñ vaale

sunegā ai 'nazīr' ab kaun mazlūmoñ kī fariyādeñ

fuġhāñ le kar kahāñ jā.eñge ab āh-o-fuġhāñ vaale

tere matam mein shamil hain zamin o aasman wale

ahinsa ke pujari sog mein hain do jahan wale

tera arman pura hoga ai amn-o-aman wale

tere jhanDe ke niche aaenge sare jahan wale

mere buDhe bahadur is buDhape mein jawan-mardi

nishan goli ke sine par hain goli ke nishan wale

nishan hain goliyon ke ya khile hain phul sine par

usi ko mar Dala jis ne sar uncha kiya sab ka

na kyun ghairat se sar nicha karen hindostan wale

mere gandhi zamin walon ne teri qadr jab kam ki

uTha kar le gae tujh ko zamin se aasman wale

zamin par jin ka matam hai falak par dhum hai un ki

zara si der mein dekho kahan pahunche kahan wale

pahunchta dhum se manzil pe apna karwan ab tak

agar dushman na hote karwan ke karwan wale

sunega ai 'nazir' ab kaun mazlumon ki fariyaaden

fughan le kar kahan jaenge ab aah-o-fughan wale