gandhi ke baad

ba.ad gāñdhī ke na sun ham ne samāñ dekhā kyā

fasl-e-gul aate hī har bāġh-o-chaman ujḌā kyā

dil hī afsurda ho jab peshkash-e-sahbā kyā

aañkh hī jab na rahe da.avat-e-nazzāra kyā

zindagī maut se bad-tar ho to phir jiinā kyā

bhuuk se dāman-e-hastī ko siye jaate haiñ

zindagī chhīn ke auroñ ke jiye jaate haiñ

har-nafas ahd vafāoñ ke liye jaate haiñ

ḳhuun arzāñ hai ġharīboñ kā piye jaate haiñ

jab ye piine hī par aa jaa.eñ to phir dariyā kyā

husn bhī ġhamza-o-andāz-o-adā bhuul gayā

ishq bhī jalva-e-rañgīñ kī ziyā bhuul gayā

jo parastār-e-vafā thā vo vafā bhuul gayā

raah sunte haiñ ki ḳhud rāh-numā bhuul gayā

kārvāñ manzil-e-maqsūd pe pahuñchātā kyā

ye jo aa.ī hai hamāre hī lahū kī hai bahār

ye jo uḌtā hai hamāre hī diloñ kā hai ġhubār

barahman hai to koī ābid-e-shab-zinda-dār

koī suntā nahīñ is daur meñ insāñ kī pukār

bazm-e-mātam meñ jo chheḌe to koī naġhma kyā

ḳhirman-e-zulm ko ab aag lagā de koī

chāñd-tāroñ ke charāġhoñ ko bujhā de koī

āsmānoñ ko zamīnoñ pe jhukā de koī

jā ke 'gāñdhī' ki ye sab haal sunā de koī

zulm dhāte haiñ ahinsā ke pujārī kyā kyā

baad gandhi ke na sun hum ne saman dekha kya

fasl-e-gul aate hi har bagh-o-chaman ujDa kya

dil hi afsurda ho jab peshkash-e-sahba kya

aankh hi jab na rahe dawat-e-nazzara kya

zindagi maut se bad-tar ho to phir jina kya

bhuk se daman-e-hasti ko siye jate hain

zindagi chhin ke auron ke jiye jate hain

har-nafas ahd wafaon ke liye jate hain

KHun arzan hai gharibon ka piye jate hain

jab ye pine hi par aa jaen to phir dariya kya

husn bhi ghamza-o-andaz-o-ada bhul gaya

ishq bhi jalwa-e-rangin ki ziya bhul gaya

jo parastar-e-wafa tha wo wafa bhul gaya

rah sunte hain ki KHud rah-numa bhul gaya

karwan manzil-e-maqsud pe pahunchata kya

ye jo aai hai hamare hi lahu ki hai bahaar

ye jo uDta hai hamare hi dilon ka hai ghubar

barahman hai to koi aabid-e-shab-zinda-dar

koi sunta nahin is daur mein insan ki pukar

bazm-e-matam mein jo chheDe to koi naghma kya

KHirman-e-zulm ko ab aag laga de koi

chand-taron ke charaghon ko bujha de koi

aasmanon ko zaminon pe jhuka de koi

ja ke 'gandhi' ki ye sab haal suna de koi

zulm dhate hain ahinsa ke pujari kya kya