mahatma-gandhi

sunā rahā huuñ tumheñ dāstān gāñdhī kī

zamāne-bhar se nirālī hai shaan gāñdhī kī

rahe rahe na rahe is meñ jaan gāñdhī kī

na ruk sakī na rukegī zabān gāñdhī kī

yahī sabab hai jo vo dil se sab ko pyārā hai

vatan kā apne chamaktā huā sitārā hai

banā thā mast koī aur koī saudā.ī

har ek samt thī ġhaflat kī jab ghaTā chhā.ī

to us kī aql-e-rasā kaam vaqt par aa.ī

marīz-e-mulk hai mamnūn-e-chāra-farmā.ī

na.e ḳhayāl meñ ik ik kā dil asiir huā

udhar amiir huā aur udhar faqīr huā

jafā-o-jaur ne kī ḳhuub apnī barbādī

ḳharāb-hāl na dil raat kyuuñ huuñ fariyādī

banā diyā thā qafas kā burī tarah aadī

magar hai shukr milā ham ko dars-e-āzādī

zamāna kahtā hai gāñdhī mahātmā vo hai

bashar nahīñ hai haqīqat meñ devtā vo hai

jo dil meñ yaad hai to lab pe naam us kā hai

jo hai to zikr faqat sub.h-o-shām us kā hai

bhalā.ī sab kī ho jis se vo kaam us kā hai

jahāñ bhī jaao vahīñ ehtirām us kā hai

uThā.e sar koī kyā sar uThā nahīñ saktā

muqāble ke liye aage aa nahīñ saktā

kisī se us ko mohabbat kisī se ulfat hai

kisī ko us kī hai us ko kisī kī hasrat hai

vafā-o-lutf tarahhum kī ḳhaas aadat hai

ġharaz karam hai mudārāt hai ināyat hai

kisī ko dekh hī saktā nahīñ hai mushkil meñ

ye baat kyuuñ hai ki rakhtā hai dard vo dil meñ

vo rashk-e-sham-e-hidāyāt hai anjuman ke liye

vo misl-e-rūh-e-ravāñ unsur-e-badan ke liye

vo ek sāġhar-e-nau mahfil-e-kuhan ke liye

vo ḳhaas maslah-e-kul shaiḳh-o-barahman ke liye

lagan use hai ki sab mālik-e-vatan ho jaa.eñ

qafas se chhūT ke zīnat-dah-e-chaman ho jaa.eñ

jafā-shi.ār se hotā hai bar-sar-e-paikār

na paas top na golā na qabze meñ talvār

zamāna tāba-e-irshād hukm par tayyār

vo paak shakl se paidā haiñ josh ke āsār

kisī ḳhayāl se charḳhe ke bal pe laḌtā hai

khaḌī hai fauj ye tanhā magar akaḌtā hai

tarah tarah ke sitam dil par apne sahtā hai

hazār koī kahe kuchh ḳhamosh rahtā hai

kahāñ sharīk haiñ āñkhoñ se ḳhuun bahtā hai

suno suno ki ye ik kahne vaalā kahtā hai

jo aabrū tumheñ rakhnī ho josh meñ aao

raho na be-ḳhud-o-be-hosh hosh meñ aao

usī ko ghere amīr-o-ġharīb rahte haiñ

nadīm-o-mūnish-o-yār-o-habīb rahte haiñ

adab ke saath adab se adiib rahte haiñ

nasīb-var haiñ vo baḌe ḳhush-nasīb rahte haiñ

koī batā.e to yuuñ dekh-bhāl kis kī hai

jo us se baat kare ye majāl kis kī hai

rifāh-e-ām se raġhbat hai aur matlab hai

anokhī baat nirālī ravish nayā Dhab hai

yahī ḳhayāl thā pahle yahī ḳhayāl ab hai

faqat hai diin yahī bas yahī to maz.hab hai

agar bajā hai to 'bismil' kī arz bhī sun lo

chaman hai sāmne do-chār phuul tum chun lo

suna raha hun tumhein dastan gandhi ki

zamane-bhar se nirali hai shan gandhi ki

rahe rahe na rahe is mein jaan gandhi ki

na ruk saki na rukegi zaban gandhi ki

yahi sabab hai jo wo dil se sab ko pyara hai

watan ka apne chamakta hua sitara hai

bana tha mast koi aur koi saudai

har ek samt thi ghaflat ki jab ghaTa chhai

to us ki aql-e-rasa kaam waqt par aai

mariz-e-mulk hai mamnun-e-chaara-farmai

nae KHayal mein ek ek ka dil asir hua

udhar amir hua aur udhar faqir hua

jafa-o-jaur ne ki KHub apni barbaadi

KHarab-haal na dil raat kyun hun fariyaadi

bana diya tha qafas ka buri tarah aadi

magar hai shukr mila hum ko dars-e-azadi

zamana kahta hai gandhi mahatma wo hai

bashar nahin hai haqiqat mein dewta wo hai

jo dil mein yaad hai to lab pe nam us ka hai

jo hai to zikr faqat subh-o-sham us ka hai

bhalai sab ki ho jis se wo kaam us ka hai

jahan bhi jao wahin ehtiram us ka hai

uThae sar koi kya sar uTha nahin sakta

muqable ke liye aage aa nahin sakta

kisi se us ko mohabbat kisi se ulfat hai

kisi ko us ki hai us ko kisi ki hasrat hai

wafa-o-lutf tarahhum ki KHas aadat hai

gharaz karam hai mudaraat hai inayat hai

kisi ko dekh hi sakta nahin hai mushkil mein

ye baat kyun hai ki rakhta hai dard wo dil mein

wo rashk-e-sham-e-hidayat hai anjuman ke liye

wo misl-e-ruh-e-rawan unsur-e-badan ke liye

wo ek saghar-e-nau mahfil-e-kuhan ke liye

wo KHas maslah-e-kul shaiKH-o-barahman ke liye

lagan use hai ki sab malik-e-watan ho jaen

qafas se chhuT ke zinat-dah-e-chaman ho jaen

jafa-shiar se hota hai bar-sar-e-paikar

na pas top na gola na qabze mein talwar

zamana taba-e-irshad hukm par tayyar

wo pak shakl se paida hain josh ke aasar

kisi KHayal se charKHe ke bal pe laDta hai

khaDi hai fauj ye tanha magar akaDta hai

tarah tarah ke sitam dil par apne sahta hai

hazar koi kahe kuchh KHamosh rahta hai

kahan sharik hain aankhon se KHun bahta hai

suno suno ki ye ek kahne wala kahta hai

jo aabru tumhein rakhni ho josh mein aao

raho na be-KHud-o-be-hosh hosh mein aao

usi ko ghere amir-o-gharib rahte hain

nadim-o-munish-o-yar-o-habib rahte hain

adab ke sath adab se adib rahte hain

nasib-war hain wo baDe KHush-nasib rahte hain

koi batae to yun dekh-bhaal kis ki hai

jo us se baat kare ye majal kis ki hai

rifah-e-am se raghbat hai aur matlab hai

anokhi baat nirali rawish naya Dhab hai

yahi KHayal tha pahle yahi KHayal ab hai

faqat hai din yahi bas yahi to mazhab hai

agar baja hai to 'bismil' ki arz bhi sun lo

chaman hai samne do-chaar phul tum chun lo