mahshar

dil-e-vahshī junūñ kī kaun sī manzil thī kal shab

jahāñ bāham hue qazzāq-o-dilbar

chale ḳhanjar gale par āstīñ par

dil-o-dāman pe dastār-o-jabīñ par

ajab ek shor thā mahshar bapā thā

bahut āh-o-fuġhāñ andoh jaanī

hazāroñ zaḳhm aur ek saḳht jaanī

na jaane shiddat-e-yalġhār kyā thī

nahīñ ma.alūm kyā muddat rahī

kisht-e-nigārāñ kī

khulī jab aañkh to

ek TūTte nashe kā aalam thā

shafaq-gūñ thā ufuq dil kā

chaman kā rāsta dhabboñ se pur thā

aur sabā dāman meñ apne ḳhuun kī bū baas rakhtī thī

nazāra dīdanī thā

aur dil-e-betāb ne dekhā

lahū se laal hai sehn-e-chaman aur har taraf

bad-rañg ḳhuuñ kī lāla-kārī hai

nagīna dil kā sau TukḌe paḌā hai

aur har TukḌe meñ koī aks-e-vahshī hai

dil-o-dilbar kī āshufta-sarī hai

dil-o-dilbar kī rāhoñ meñ

faqat shīshe kī kircheñ haiñ

dil-e-wahshi junun ki kaun si manzil thi kal shab

jahan baham hue qazzaq-o-dilbar

chale KHanjar gale par aastin par

dil-o-daman pe dastar-o-jabin par

ajab ek shor tha mahshar bapa tha

bahut aah-o-fughan andoh jaani

hazaron zaKHm aur ek saKHt jaani

na jaane shiddat-e-yalghaar kya thi

nahin malum kya muddat rahi

kisht-e-nigaran ki

khuli jab aankh to

ek TuTte nashe ka aalam tha

shafaq-gun tha ufuq dil ka

chaman ka rasta dhabbon se pur tha

aur saba daman mein apne KHun ki bu bas rakhti thi

nazara didani tha

aur dil-e-betab ne dekha

lahu se lal hai sehn-e-chaman aur har taraf

bad-rang KHun ki lala-kari hai

nagina dil ka sau TukDe paDa hai

aur har TukDe mein koi aks-e-wahshi hai

dil-o-dilbar ki aashufta-sari hai

dil-o-dilbar ki rahon mein

faqat shishe ki kirchen hain