main ajnabi nahin

mire ḳhudā tū mire qalb ko munavvar kar

mire vajūd ko behtar se aur behtar kar

mirī hayāt tire zikr meñ guzar jaa.e

karam bas itnā ai parvardigār mujh par kar

agar hai sar pe mire āftāb hī rakhnā

nasīb meñ hai agar iztirāb hī rakhnā

tū ai ḳhudā-e-karīm ik yahī duā sun le

har imtihāñ meñ mujhe kāmyāb hī rakhnā

mirā zamīr kabhī dāġh-dār ho na sake

kisī ke sāmne bhī sharmsār ho na sake

mujhe tū nafs kā mere kabhī ġhulām na kar

kabhī vo zehn pe hargiz savār ho na sake

mire shu.ūr ko kuchh aur hī qavī kar de

tū mere zehn ko kuchh aur hī ġhanī kar de

har ek lafz meñ maiñ zindagī pirotā rahūñ

tū mere karb ko kuchh aur shabnamī kar de

maiñ jāntā huuñ ki kuchh bhī nahīñ huuñ duniyā maiñ

judā judā sā huuñ gosha-nashīñ huuñ duniyā meñ

magar hai phir bhī tirā shukr ai mire mālik

maiñ ajnabī nahīñ raushan-jabīñ huuñ duniyā meñ

mere KHuda tu mere qalb ko munawwar kar

mere wajud ko behtar se aur behtar kar

meri hayat tere zikr mein guzar jae

karam bas itna ai parwardigar mujh par kar

agar hai sar pe mere aaftab hi rakhna

nasib mein hai agar iztirab hi rakhna

tu ai KHuda-e-karim ek yahi dua sun le

har imtihan mein mujhe kaamyab hi rakhna

mera zamir kabhi dagh-dar ho na sake

kisi ke samne bhi sharmsar ho na sake

mujhe tu nafs ka mere kabhi ghulam na kar

kabhi wo zehn pe hargiz sawar ho na sake

mere shuur ko kuchh aur hi qawi kar de

tu mere zehn ko kuchh aur hi ghani kar de

har ek lafz mein main zindagi pirota rahun

tu mere karb ko kuchh aur shabnami kar de

main jaanta hun ki kuchh bhi nahin hun duniya main

juda juda sa hun gosha-nashin hun duniya mein

magar hai phir bhi tera shukr ai mere malik

main ajnabi nahin raushan-jabin hun duniya mein