main apne aap se kab tak tumhaara nam puchhunga

parindoñ se sabaq sīkhā shajar se guftugū kī hai

savād-e-jāñ kī ḳhāmoshī meñ Thahre

abr-e-tanhā.ī kī uudī zard chādar par

shuā-e-yād ke hāthoñ likhī har be-navā lamhe kī puurī dāstāñ

maiñ ne paḌhī hai

nashāt-añgez rātoñ aur ḳhvāboñ ke shafaq-ālūd chehre ko

jhulaste din kī ḳhīra-kun fazā meñ

ek umr-e-rā.egāñ ke aa.ine meñ mahv ho kar kab nahīñ dekhā

baras guzre ruteñ biitī vatan se be-vatan hone kī saarī bebasī jhelī

maiñ barfānī ilāqoñ marġh-zāroñ vādiyoñ aur regzāroñ se

nishān-e-kārvāñ chuntā sadā-e-raftagāñ suntā huā guzrā

kahāñ mumkin thā lekin maiñ ne jo dekhā sunā vo yaad rakkhā ajab ye hai

nahīñ gar hāfize meñ kuchh to vo ik naam hai terā

ḳhabar kab thī ki bahtī umr kī sarkash ravānī meñ

mujhe jo yaad rahnā chāhiye thā

maiñ vahī ik naam bhūlūñgā

parindoñ aur peḌoñ se jahāñ bhī guftugū hogī

tumhārā zikr aate hī dhundalke

zehn meñ ik mauja-e-tārīk ban kar phailte jā.eñge

aur ye hāfiza maflūj āñkhoñ se mujhe

ghūregā chillā.egā

ḳhauf-e-ḳhud-farāmoshī se tum Darte the lekin ab

ma.āl-e-ḳhud-farāmoshī se tum kaise nibhāoge

ġhubār andar ġhubār añgḌā.iyāñ lete hue

raste meñ jo kuchh kho chuke ho us ko kaise DhūñD pāoge

ye lāzim to nahīñ hai, ek an-būjhī pahelī jab achānak yaad aa jaa.e

use har haal meñ har baar būjhoge

tum apne aap se kab tak kisī kā naam pūchhoge

parindon se sabaq sikha shajar se guftugu ki hai

sawad-e-jaan ki KHamoshi mein Thahre

abr-e-tanhai ki udi zard chadar par

shua-e-yaad ke hathon likhi har be-nawa lamhe ki puri dastan

main ne paDhi hai

nashat-angez raaton aur KHwabon ke shafaq-alud chehre ko

jhulaste din ki KHira-kun faza mein

ek umr-e-raegan ke aaine mein mahw ho kar kab nahin dekha

baras guzre ruten biti watan se be-watan hone ki sari bebasi jheli

main barfani ilaqon margh-zaron wadiyon aur regzaron se

nishan-e-karwan chunta sada-e-raftagan sunta hua guzra

kahan mumkin tha lekin main ne jo dekha suna wo yaad rakkha ajab ye hai

nahin gar hafize mein kuchh to wo ek nam hai tera

KHabar kab thi ki bahti umr ki sarkash rawani mein

mujhe jo yaad rahna chahiye tha

main wahi ek nam bhulunga

parindon aur peDon se jahan bhi guftugu hogi

tumhaara zikr aate hi dhundalke

zehn mein ek mauja-e-tarik ban kar phailte jaenge

aur ye hafiza mafluj aankhon se mujhe

ghurega chillaega

KHauf-e-KHud-faramoshi se tum Darte the lekin ab

maal-e-KHud-faramoshi se tum kaise nibhaoge

ghubar andar ghubar angDaiyan lete hue

raste mein jo kuchh kho chuke ho us ko kaise DhunD paoge

ye lazim to nahin hai, ek an-bujhi paheli jab achanak yaad aa jae

use har haal mein har bar bujhoge

tum apne aap se kab tak kisi ka nam puchhoge