main aur main!

maiñ huuñ maiñ

vo jis kī āñkhoñ meñ jiite jāgte dard haiñ

dard ki jin kī ham-rāhī meñ dil raushan hai

dil jis se maiñ ne ik din ik ahd kiyā thā

ahd ki donoñ ek hī aag meñ jalte raheñge

aag ki jis meñ jal kar jism huā ḳhākistar

jism ki jis ke kachche zaḳhm bahut dukhte the

zaḳhm ki jin kā marham vaqt ke paas nahīñ hai

vaqt ki jis kī zad meñ saare sayyāre haiñ

sayyāre jo qaa.em haiñ apnī hī kashish par

aur kashish ke tāne-bāne TuuT chale haiñ

kaun tamāshā.ī hai? maiñ huuñ... aur tamāshā

maiñ huuñ maiñ!

main hun main

wo jis ki aankhon mein jite jagte dard hain

dard ki jin ki ham-rahi mein dil raushan hai

dil jis se main ne ek din ek ahd kiya tha

ahd ki donon ek hi aag mein jalte rahenge

aag ki jis mein jal kar jism hua KHakistar

jism ki jis ke kachche zaKHm bahut dukhte the

zaKHm ki jin ka marham waqt ke pas nahin hai

waqt ki jis ki zad mein sare sayyare hain

sayyare jo qaem hain apni hi kashish par

aur kashish ke tane-bane TuT chale hain

kaun tamashai hai? main hun aur tamasha

main hun main!