main aur meri tanhai

ham samundar se milne zarā der se pahuñche

raat samundar se ziyādā gahrī ho rahī thī

ham nañge paañv sāhil ke saath

bahut duur tak chale

dinoñ ke ba.ad sarshārī ne apnā chehrā dikhāyā thā

aur hamārī bhūlī huī dhun gungunā.ī thī

samundar hamārī ḳhāmoshī meñ Dūbne hī vaalā thā

jab hamārā giit patvār huā

ajnabī qadmoñ ke nishān chunte hue

ḳhayāl aayā

chahal-qadmī karte hue vo do saa.e kyā hue

ye lahreñ jin ke paañv churā laa.ī haiñ

tabhī ham ne apne jūtoñ meñ jhāñk kar dekhā

sāhil abhī puurī tarah nahīñ phislā thā

ham ne sochā

samundar ko ab so jaanā chāhiye

raat kī ḳhunkī hamārī ragoñ meñ utar chukī thī

jab ham vāpsī ke liye muḌe

samundar baḌī garm-joshī ke saath hameñ ruḳhsat karne aayā

ġhunūda chāñd raushan huā

aur hameñ ghar tak chhoḌne kī zid kī

ham ne dabe-pāñv ūñghte darvāze par dastak dī

jahāñ udāsī der se hamārā intizār kar rahī thii!

hum samundar se milne zara der se pahunche

raat samundar se ziyaada gahri ho rahi thi

hum nange panw sahil ke sath

bahut dur tak chale

dinon ke baad sarshaari ne apna chehra dikhaya tha

aur hamari bhuli hui dhun gungunai thi

samundar hamari KHamoshi mein Dubne hi wala tha

jab hamara git patwar hua

ajnabi qadmon ke nishan chunte hue

KHayal aaya

chahal-qadmi karte hue wo do sae kya hue

ye lahren jin ke panw chura lai hain

tabhi hum ne apne juton mein jhank kar dekha

sahil abhi puri tarah nahin phisla tha

hum ne socha

samundar ko ab so jaana chahiye

raat ki KHunki hamari ragon mein utar chuki thi

jab hum wapsi ke liye muDe

samundar baDi garm-joshi ke sath hamein ruKHsat karne aaya

ghunuda chand raushan hua

aur hamein ghar tak chhoDne ki zid ki

hum ne dabe-panw unghte darwaze par dastak di

jahan udasi der se hamara intizar kar rahi thi!