main aur tum

tum sūraj maiñ rang-e-kiran

tum sāgar ho maiñ mauj-e-magan

tum khulā samundar maiñ qatra

tum sach ho aur maiñ afsāna

tum raushan din maiñ shab-zādī

tum raushaniyāñ phailāte ho

zarra zarra chamkāte ho

maiñ ek pujāran dev-dāsī

chupke se bāhar aatī huuñ

aur kirnoñ kī is barkhā meñ

apnā tan-man nahlātī huuñ

tum jīvan-jot jagāte ho

aur mujh ko bhī chamkāte ho

tum rang bharā madhū-shālā ho

aur maiñ to ḳhālī pyāla huuñ

tum dhartī kā ujyālā ho

maiñ raat kā gahrā sannāTā

tum jhilmil jhilmil maalā ho

maiñ pair meñ chubhtā ik kāñTā

har mausam kā ho ruup bhī tum

saaya bhī tum ho dhuup bhī tum

maiñ kaun huuñ koī batā.e to

is gutthī ko suljhā.e to

tum suraj main rang-e-kiran

tum sagar ho main mauj-e-magan

tum khula samundar main qatra

tum sach ho aur main afsana

tum raushan din main shab-zadi

tum raushaniyan phailate ho

zarra zarra chamkate ho

main ek pujaran dew-dasi

chupke se bahar aati hun

aur kirnon ki is barkha mein

apna tan-man nahlati hun

tum jiwan-jot jagate ho

aur mujh ko bhi chamkate ho

tum rang bhara madhu-shaala ho

aur main to KHali pyala hun

tum dharti ka ujyala ho

main raat ka gahra sannaTa

tum jhilmil jhilmil mala ho

main pair mein chubhta ek kanTa

har mausam ka ho rup bhi tum

saya bhi tum ho dhup bhi tum

main kaun hun koi batae to

is gutthi ko suljhae to