main

hayāt ke bahr-e-be-karāñ meñ misāl-e-qatra huuñ aur kyā huuñ

magar shu.ūr-e-ḳhudī hai mujh ko maiñ apnī hastī se āshnā huuñ

ye mere sāz-e-anā kī lai hai jo bazm-e-ālam meñ gūñjtī hai

vo jis meñ hastī kā zer-o-bam hai maiñ jazba-e-dil kī vo sadā huuñ

fanā kī tez aur tund āñdhī meñ zau-fishāñ jo rahī hamesha

hayāt kā nuur mujh meñ pinhāñ jahāñ meñ ik mash.al-e-baqā huuñ

mire hī zauq-e-nazar se qaa.em hai rang gulzār-e-zindagī kā

bahār zer-e-qadam hai jis ke maiñ vo nasīm-e-latīf-pā huuñ

mirī nazar kī tajalliyoñ meñ ye māh-o-anjum kī raushnī hai

ujālā kaun-o-makāñ meñ jis se maiñ vo shuā-e-tajallī-zā huuñ

hayat ke bahr-e-be-karan mein misal-e-qatra hun aur kya hun

magar shuur-e-KHudi hai mujh ko main apni hasti se aashna hun

ye mere saz-e-ana ki lai hai jo bazm-e-alam mein gunjti hai

wo jis mein hasti ka zer-o-bam hai main jazba-e-dil ki wo sada hun

fana ki tez aur tund aandhi mein zau-fishan jo rahi hamesha

hayat ka nur mujh mein pinhan jahan mein ek mashal-e-baqa hun

mere hi zauq-e-nazar se qaem hai rang gulzar-e-zindagi ka

bahaar zer-e-qadam hai jis ke main wo nasim-e-latif-pa hun

meri nazar ki tajalliyon mein ye mah-o-anjum ki raushni hai

ujala kaun-o-makan mein jis se main wo shua-e-tajalli-za hun