main jinsi khel ko sirf ek tan-asani samajhta hun

maiñ jinsī khel ko sirf ik tan-āsānī samajhtā huuñ

zarīya aur hai ma.abūd se milne kā duniyā meñ

taḳhayyul kā baḌā sāgar tasavvur ke hasīñ jhoñke

liye aate haiñ bārish meñ tamannā.eñ ibādat kī

magar puurī nahīñ hotī tamannā dil kī chāhat kī

kisī aurat kā pairāhan kisī ḳhalvat kī ḳhushbueñ

kisī ik lafz-e-be-ma.anī kī mīThī mīThī sargoshī

yahī chīzeñ mire ġhamgīñ ḳhayāloñ par hamesha chhā.ī rahtī haiñ

ibādat kā tarīqa harkateñ haiñ tishna o mub.ham

kabhī rūh-e-sanam bedār ḳhvāb-e-marg-e-muhmal se

kisī indar-sabhā kī laakh pariyāñ aa ke bahlā.eñ

lubhāte naach nācheñ aur rasīle raag bhī gaa.eñ

magar ye murda-dil aadī hai bas ġhamgīñ ḳhayāloñ kā

ghaTā aatī nahīñ ḳhushiyoñ kī bārish lā nahīñ saktī

mirī rūh-e-hazīñ mahkūm hai apne ta.assur kī

zarīya aur hai ma.abūd se milne kā duniyā meñ

maiñ jinsī khel ko kyuuñ ik tan-āsānī samajhtā huuñ

kabhī insāñ kī umr-e-muḳhtasar par ġhaur kartā huuñ

kabhī faanī tamannāoñ kī jhīloñ meñ yūñhī khoyā sā phirtā huuñ

main jinsi khel ko sirf ek tan-asani samajhta hun

zariya aur hai mabud se milne ka duniya mein

taKHayyul ka baDa sagar tasawwur ke hasin jhonke

liye aate hain barish mein tamannaen ibaadat ki

magar puri nahin hoti tamanna dil ki chahat ki

kisi aurat ka pairahan kisi KHalwat ki KHushbuen

kisi ek lafz-e-be-mani ki miThi miThi sargoshi

yahi chizen mere ghamgin KHayalon par hamesha chhai rahti hain

ibaadat ka tariqa harkaten hain tishna o mubham

kabhi ruh-e-sanam bedar KHwab-e-marg-e-muhmal se

kisi indar-sabha ki lakh pariyan aa ke bahlaen

lubhate nach nachen aur rasile rag bhi gaen

magar ye murda-dil aadi hai bas ghamgin KHayalon ka

ghaTa aati nahin KHushiyon ki barish la nahin sakti

meri ruh-e-hazin mahkum hai apne tassur ki

zariya aur hai mabud se milne ka duniya mein

main jinsi khel ko kyun ek tan-asani samajhta hun

kabhi insan ki umr-e-muKHtasar par ghaur karta hun

kabhi fani tamannaon ki jhilon mein yunhi khoya sa phirta hun