main kaun hun

kis se pūchhūñ ki jhuuT sach kyā hai

tīrgī kyā hai raushnī kyā hai

kaun me.ayār-e-ḳhair-o-shar samjhā.e

kaun takzīb-e-jabr-o-jahl kare

vaqt kis samt hai ravāñ paiham

vaj.h-e-taḳhlīq-o-irtiqā kyā hai

zindagī vahm hai haqīqat hai

shajar-e-dard-e-sāya-e-ġham hai

kis se mafhūm-e-mā-o-man pūchhūñ

kaun taqdīr-e-husn-o-ishq batā.e

kis se pūchhūñ salīb-o-dār kā raaz

azmat-e-jām-e-zahr kaun batā.e

aql-o-dānish pe kufr ke fatve

fikr-o-fan par hai tohmat-e-ilhād

is taqaddus-ma.āb duniyā meñ

kis se pūchhūñ maiñ kaun huuñ kyā huuñ

koī afsāna koī ḳhvāb huuñ maiñ

koī tahrīr-e-nā-tamām huuñ maiñ

koī sahrā-e-dard-o-karb huuñ maiñ

ḳhauf-o-ḳhadshāt ke jahannum meñ

kitnī sadiyoñ se jal rahā huuñ maiñ

kis se puchhun ki jhuT sach kya hai

tirgi kya hai raushni kya hai

kaun meayar-e-KHair-o-shar samjhae

kaun takzib-e-jabr-o-jahl kare

waqt kis samt hai rawan paiham

wajh-e-taKHliq-o-irtiqa kya hai

zindagi wahm hai haqiqat hai

shajar-e-dard-e-saya-e-gham hai

kis se mafhum-e-ma-o-man puchhun

kaun taqdir-e-husn-o-ishq batae

kis se puchhun salib-o-dar ka raaz

azmat-e-jam-e-zahr kaun batae

aql-o-danish pe kufr ke fatwe

fikr-o-fan par hai tohmat-e-ilhad

is taqaddus-maab duniya mein

kis se puchhun main kaun hun kya hun

koi afsana koi KHwab hun main

koi tahrir-e-na-tamam hun main

koi sahra-e-dard-o-karb hun main

KHauf-o-KHadshat ke jahannum mein

kitni sadiyon se jal raha hun main