main ki ek bani-adam

maiñ ki ik banī-ādam

ālam-e-anāsir kā

ik ḳhamīr-e-tāza-dam

ik hayāt mujh meñ hai

kā.enāt mujh meñ hai

merī saltanat hai sab

mujh se hai jahāñ qaa.em

maiñ huuñ gardish-e-paiham

rau meñ hai lahū har dam

kyā ḳhabar lahū kyā hai

ek shorish-e-hastī

ek dāḳhlī tūfāñ

ek mahshar-e-daurāñ

kyā ḳhabar lahū kyā hai

gardisheñ sitāroñ kī

gardish āsmānoñ kī

gardisheñ zamīnoñ kī

gardisheñ zamānoñ kī

kyā ḳhabar lahū kyā hai

ye nizām-e-kul jaarī

ya.anī harkateñ saarī

sab lahū kī harakat hai

hai lahū ke dam se hī

amn bhii, mohabbat bhī

jañg bhii, adāvat bhī

shorish o baġhāvat bhī

kyā ḳhabar lahū kyā hai

gardisheñ lahū kī jab

mujh meñ shor kartī haiñ

be-ḳhudī ke nashshe meñ

jism kā har ik ḳhaliya

raqs karne lagtā hai

aur phir ye hotā hai

ḳhushkiyoñ kā har zarra

pāniyoñ kā har qatra

ek be-badan jazba

raqs karne lagtā hai

is jinnoñ ke aalam meñ

zaḳhm jaag jaate haiñ

dard chīḳh uThtā hai

aur phir ye hotā hai

rūh-o-dil kī vaadī meñ

naġhme guuñj uThte haiñ

naġhma-hā-e-sehr-añgez

be-karāñ fazāoñ meñ

lā-makāñ ḳhalāoñ meñ

soz aur fuġhāñ ban kar

mīThī lai meñ Dhal Dhal kar

jab bikharne lagte haiñ

aise sehr-ālam meñ

ek kaif-o-mastī kā

nashsha chhāne lagtā hai

aur phir ye hotā hai

kā.enāt kī har shai

gungunāne lagtī hai

aur phir vahī naġhme

rūh-o-dil ke chhāloñ ko

taar, taar zaḳhmoñ ko

nīm-jāñ karāhoñ ko

lāla-zār dāġhoñ ko

jāgte phaphūloñ ko

mast loriyāñ de kar

ḳhvāb ke gulistāñ meñ

lāpata zamāne tak

yuuñ hī chhoḌ dete haiñ

asl meñ vahī naġhme

dard kā mudāvā haiñ!!

main ki ek bani-adam

aalam-e-anasir ka

ek KHamir-e-taza-dam

ek hayat mujh mein hai

kaenat mujh mein hai

meri saltanat hai sab

mujh se hai jahan qaem

main hun gardish-e-paiham

rau mein hai lahu har dam

kya KHabar lahu kya hai

ek shorish-e-hasti

ek daKHli tufan

ek mahshar-e-dauran

kya KHabar lahu kya hai

gardishen sitaron ki

gardish aasmanon ki

gardishen zaminon ki

gardishen zamanon ki

kya KHabar lahu kya hai

ye nizam-e-kul jari

yani harkaten sari

sab lahu ki harakat hai

hai lahu ke dam se hi

amn bhi, mohabbat bhi

jang bhi, adawat bhi

shorish o baghawat bhi

kya KHabar lahu kya hai

gardishen lahu ki jab

mujh mein shor karti hain

be-KHudi ke nashshe mein

jism ka har ek KHaliya

raqs karne lagta hai

aur phir ye hota hai

KHushkiyon ka har zarra

paniyon ka har qatra

ek be-badan jazba

raqs karne lagta hai

is jinnon ke aalam mein

zaKHm jag jate hain

dard chiKH uThta hai

aur phir ye hota hai

ruh-o-dil ki wadi mein

naghme gunj uThte hain

naghma-ha-e-sehr-angez

be-karan fazaon mein

la-makan KHalaon mein

soz aur fughan ban kar

miThi lai mein Dhal Dhal kar

jab bikharne lagte hain

aise sehr-alam mein

ek kaif-o-masti ka

nashsha chhane lagta hai

aur phir ye hota hai

kaenat ki har shai

gungunane lagti hai

aur phir wahi naghme

ruh-o-dil ke chhaalon ko

tar, tar zaKHmon ko

nim-jaan karahon ko

lala-zar daghon ko

jagte phaphulon ko

mast loriyan de kar

KHwab ke gulistan mein

lapata zamane tak

yun hi chhoD dete hain

asl mein wahi naghme

dard ka mudawa hain!!