main kuchh bhi kah na paya

tāñge kā ek ghoḌā

lañgDā thā thoḌā thoḌā

pūchhā jo maiñ ne us se

kyā paañv meñ hai phoḌā

bolā ye zulm mujh par

ik aadmī ne toḌā

pahle to us ne mujh ko

tāñge meñ lā ke joḌā

phir us ko ḳhuub bhar kar

bolā ki chal manoḌā

jab maiñ khisak na paayā

lahrāyā us ne koḌā

maarā mujhe taḌātaḌ

phir dum ko bhī maroḌā

maiñ bilbilā ke bhāgā

bas ban gayā bhagoḌā

ḳhud bhī girā phisal kar

ek ik kā sar bhī phoḌā

us din se aaj tak maiñ

lañgDā huuñ thoḌā thoḌā

ye dāstāñ sunā kar

bolā vo hinhinā kar

maiñ ne to munnū bhaa.ī

tabī.at hai saada paa.ī

ḳhud apne muñh se apnī

kartā nahīñ baḌā.ī

qur.ān-e-pāk ne bhī

merī qasam hai khaa.ī

gar tīsvāñ sipārah

tum ne paḌhā ho bhaa.ī

val-ādiyāt zabhan meñ

baat hai ye aa.ī

insāñ to apne rab se

kartā he bevafā.ī

bas māl-o-zar ke pīchhe

hai zindagī gañvā.ī

ghoḌoñ ne mālikoñ par

hai jaan bhī luTā.ī

ham log hañste gaate

har bojh haiñ uThāte

haiñ jānvar hamesha

insāñ ke kaam aate

māhaul kī kashish bhī

ham log haiñ baḌhāte

dilkash parind pyāre

shāḳhoñ pe chahchahāte

saare namāziyoñ ko

har sub.h haiñ jagāte

phir ḳhud bhī apne rab kī

hamd-o-sanā haiñ gaate

sau sau tarah tumhārā

ham dil bhī haiñ lubhāte

kuchh aise haiñ ki jin se

tum ho davā banāte

kuchh uun tum ko de kar

sardī se haiñ bachāte

kuchh duudh tum ko dete

kuchh gosht haiñ khilāte

gar jānvar na hote

tum ghī kidhar se laate

makkhan panīr anDe

āḳhir kahāñ se khāte

bas kyā kahūñ ki kyā kyā

haiñ fā.ede uThāte

phir bhī haiñ log ham ko

har tarah se satāte

ye baat kahte kahte

dukhḌā ye sab sunāte

aisā vo bilbilāyā

maiñ kuchh bhī kah na paayā

tange ka ek ghoDa

langDa tha thoDa thoDa

puchha jo main ne us se

kya panw mein hai phoDa

bola ye zulm mujh par

ek aadmi ne toDa

pahle to us ne mujh ko

tange mein la ke joDa

phir us ko KHub bhar kar

bola ki chal manoDa

jab main khisak na paya

lahraya us ne koDa

mara mujhe taDataD

phir dum ko bhi maroDa

main bilbila ke bhaga

bas ban gaya bhagoDa

KHud bhi gira phisal kar

ek ek ka sar bhi phoDa

us din se aaj tak main

langDa hun thoDa thoDa

ye dastan suna kar

bola wo hinhina kar

main ne to munnu bhai

tabiat hai sada pai

KHud apne munh se apni

karta nahin baDai

quran-e-pak ne bhi

meri qasam hai khai

gar tiswan siparah

tum ne paDha ho bhai

wal-adiyat zabhan mein

baat hai ye aai

insan to apne rab se

karta he bewafai

bas mal-o-zar ke pichhe

hai zindagi ganwai

ghoDon ne malikon par

hai jaan bhi luTai

hum log hanste gate

har bojh hain uThate

hain jaanwar hamesha

insan ke kaam aate

mahaul ki kashish bhi

hum log hain baDhate

dilkash parind pyare

shaKHon pe chahchahate

sare namaziyon ko

har subh hain jagate

phir KHud bhi apne rab ki

hamd-o-sana hain gate

sau sau tarah tumhaara

hum dil bhi hain lubhate

kuchh aise hain ki jin se

tum ho dawa banate

kuchh un tum ko de kar

sardi se hain bachate

kuchh dudh tum ko dete

kuchh gosht hain khilate

gar jaanwar na hote

tum ghi kidhar se late

makkhan panir anDe

aaKHir kahan se khate

bas kya kahun ki kya kya

hain faede uThate

phir bhi hain log hum ko

har tarah se satate

ye baat kahte kahte

dukhDa ye sab sunate

aisa wo bilbilaya

main kuchh bhi kah na paya