bint-e-hawwa

tum se sirf ek baar janmī ga.ī huuñ

magar tum to aaj tak

mujh se janm le rahe ho

phir maiñ mahz ik saayā ban kar kyuuñ rah ga.ī

vajūd kyuuñ nahīñ banī

merā paḌāv hamesha

tumhāre añgūThe ke nīche kyuuñ rakhā gayā hai

maiñ tumhāre naam kī sil

apne badan se haTā kar

khulī havā meñ muñh bhar kar saañs lenā chāhtī huuñ

baap bhaa.ī shauhar aur beTe ke ghar ke alāva

merā apnā vatan bhī to honā chāhiye

qaidī āñkhoñ meñ iltijā ke phuul liye

ijāzatoñ ke raah takte takte pañkhuḌiyāñ suukh kar

merī ruuh meñ kāñToñ kī tarah chhīne lagī haiñ

ḳhudārā merī āñkhoñ ko zamīn se itnā kas kar na bāñdho

ki maiñ āsmān ke rang dekhā chāhtī huuñ

aur tumhārī āñkhoñ meñ

sulagtī huī andhī anā kī chiñgāriyoñ ko

apnī rupahlī mohabbatoñ kī phuvār se sard karnā chāhtī huuñ

pairoñ se uTh kar

mere dil meñ tumhāre saath chalne kī ḳhvāhish hai

aur tum mujhe ka.ī rishtoñ kī tanāboñ meñ jakaḌ kar bhī

merī uḌaan se ḳhauf-zada ho

ye jaan kar bhī

ki agar parindoñ ke par kaaT diye jaa.eñ

to phir un ke liye pinjroñ kī zarūrat baaqī nahīñ rahtī

minnatoñ ke dard karte karte

merī zabānoñ kā gosht galne lagā hai

chalo hukm na sahī kam-az-kam

mujhe apnī baat karne kī to āzādī ho

tumhārī kohna rivāyāt kī beḌiyāñ

pinDliyoñ kā gosht kaaT kar

ab merī haDDiyāñ chabānā chāhtī haiñ

maiñ muñh ke bal girī yā ma.azūr huī

to ehtijājan bāñjh ho jā.ūñgī

aur agar meñ bāñjh huī to apne janm ke liye

ā.inda sadī ke kis kī kho meñ utroge

tum se sirf ek bar janmi gai hun

magar tum to aaj tak

mujh se janm le rahe ho

phir main mahz ek saya ban kar kyun rah gai

wajud kyun nahin bani

mera paDaw hamesha

tumhaare anguThe ke niche kyun rakha gaya hai

main tumhaare nam ki sil

apne badan se haTa kar

khuli hawa mein munh bhar kar sans lena chahti hun

bap bhai shauhar aur beTe ke ghar ke alawa

mera apna watan bhi to hona chahiye

qaidi aankhon mein iltija ke phul liye

ijazaton ke rah takte takte pankhuDiyan sukh kar

meri ruh mein kanTon ki tarah chhine lagi hain

KHudara meri aankhon ko zamin se itna kas kar na bandho

ki main aasman ke rang dekha chahti hun

aur tumhaari aankhon mein

sulagti hui andhi ana ki chingariyon ko

apni rupahli mohabbaton ki phuwar se sard karna chahti hun

pairon se uTh kar

mere dil mein tumhaare sath chalne ki KHwahish hai

aur tum mujhe kai rishton ki tanabon mein jakaD kar bhi

meri uDan se KHauf-zada ho

ye jaan kar bhi

ki agar parindon ke par kaT diye jaen

to phir un ke liye pinjron ki zarurat baqi nahin rahti

minnaton ke dard karte karte

meri zabanon ka gosht galne laga hai

chalo hukm na sahi kam-az-kam

mujhe apni baat karne ki to aazadi ho

tumhaari kohna riwayat ki beDiyan

pinDliyon ka gosht kaT kar

ab meri haDDiyan chabana chahti hain

main munh ke bal giri ya mazur hui

to ehtijajan banjh ho jaungi

aur agar mein banjh hui to apne janm ke liye

aainda sadi ke kis ki kho mein utroge