main sahra-zad hun jaanan

maiñ sun saktā huuñ phūloñ ko

maiñ chakh letā huuñ rangoñ ko

maiñ ḳhushbū gungunātā huuñ

sabā ko dekh letā huuñ

maiñ chhū saktā huuñ nik.hat ko

havāoñ kā taḳhātub huuñ

bagūloñ se ulajhtā huuñ

maiñ taptī ret par ḳhvāboñ kī ik duniyā basātā huuñ

usī ke giit gaatā huuñ

maiñ sūraj kī tamanna huuñ

tahayyur kā huuñ dil-dāda

maiñ dīvāroñ meñ darvāza

sitāre mujh meñ baste haiñ

maiñ sahrā-zād huuñ jānāñ

kahīñ bhī ḳhuun girtā hai

maiñ surḳhī thaam letā huuñ

varaq par lafz chun chun kar

maiñ nazmoñ meñ Dubotā huuñ

kahīñ maiñ biij botā huuñ

ġhazal kā surḳh rangoñ meñ

jahāñ ye rang ugte haiñ

zamīñ ke zaḳhm bharte haiñ

zamīñ ke ḳhushk chehre ko

maiñ tar kartā huuñ ashkoñ se

phir ashkoñ ke samundar se na.e motī nikalte haiñ

kahīñ maiñ ret ke siine pe kuchh nukte ugātā huuñ

vo nukte jab panapte haiñ

sitāre mujh meñ baste haiñ

maiñ sahrā-zād huuñ jānāñ

hasīñ ḳhvāboñ ke mandir meñ

ka.ī lāsheñ mujhe ab nasb karnī haiñ

ka.ī armān bone haiñ

inhī āñkhoñ ke mele meñ ka.ī idrāk khone haiñ

bayāz-e-roz-o-shab par bhī

faqat zanjīr likhnī hai

yahī tahrīr likhnī hai

sulagte haiñ vo tīnoñ daur-e-tanhā.ī

jinheñ duniyā zamānoñ se yahāñ mansūb kartī hai

vahāñ par ek manzar hai

faqat ik retīlā manzar

faqat ik be-karāñ manzar mirī palkoñ se chipkā hai

sitāre mujh meñ baste haiñ

maiñ sahrā-zād huuñ jānāñ

main sun sakta hun phulon ko

main chakh leta hun rangon ko

main KHushbu gungunata hun

saba ko dekh leta hun

main chhu sakta hun nikhat ko

hawaon ka taKHatub hun

bagulon se ulajhta hun

main tapti ret par KHwabon ki ek duniya basata hun

usi ke git gata hun

main suraj ki tamanna hun

tahayyur ka hun dil-dada

main diwaron mein darwaza

sitare mujh mein baste hain

main sahra-zad hun jaanan

kahin bhi KHun girta hai

main surKHi tham leta hun

waraq par lafz chun chun kar

main nazmon mein Dubota hun

kahin main bij bota hun

ghazal ka surKH rangon mein

jahan ye rang ugte hain

zamin ke zaKHm bharte hain

zamin ke KHushk chehre ko

main tar karta hun ashkon se

phir ashkon ke samundar se nae moti nikalte hain

kahin main ret ke sine pe kuchh nukte ugata hun

wo nukte jab panapte hain

sitare mujh mein baste hain

main sahra-zad hun jaanan

hasin KHwabon ke mandir mein

kai lashen mujhe ab nasb karni hain

kai arman bone hain

inhi aankhon ke mele mein kai idrak khone hain

bayaz-e-roz-o-shab par bhi

faqat zanjir likhni hai

yahi tahrir likhni hai

sulagte hain wo tinon daur-e-tanhai

jinhen duniya zamanon se yahan mansub karti hai

wahan par ek manzar hai

faqat ek retila manzar

faqat ek be-karan manzar meri palkon se chipka hai

sitare mujh mein baste hain

main sahra-zad hun jaanan