main urdu zaban hun

maiñ urdu zabāñ huuñ

mujhe āryāoñ ne paalā

mirī asl hindostāñ hai

ki mere lahū se hī vedoñ kī āyāt likkhī ga.ī haiñ

ye raam aur siitā kī azmat ke qisse ramāyan-kathā.eñ

krishan aur rādhā ke rangīñ fasāne

har ik lafz kī ruuh naġhma-sarā hai

maiñ urdu zabāñ huuñ

vo gautam ki jis ne mohabbat kī paiġhambarī se jahannam ko jannat banāyā

magar kis zabāñ meñ

zarā sochiye kis zabāñ meñ

vo paalī jo mere gharāne kī paalī huī thī

maiñ urdu zabāñ huuñ

mujhe dekhnā chāhte ho to aao

ajantā elora ke ġhāroñ meñ dekho

ye maiñ huuñ

mirā husn merī kashish hai abad tak

mujhe dekhnā chāhte ho to aao

ashokā kī lāToñ meñ kanda hurūf-e-muqaddas meñ dekho

ye maiñ huuñ

sadāqat adālat kī tahrīr-e-mohkam

maiñ urdu zabāñ huuñ

mohabbat kī man-mohnī dāstāñ huuñ

mirī vus.ateñ be-karāñ haiñ

ye uttar ye dakhkhin ye pūrab ye pachchhim

har ik samt mere nishāñ haiñ

deccan jo kabhī rang-o-harf-o-adā aur chañg-o-sadā se banā ek qaus-e-quzah thā

tumheñ kuchh ḳhabar hai vo kyā silsila thā

mūarriḳh se pūchho vo merā hī jaadū mirā mo.ajiza thā

maiñ 'ḳhusrav' kī pyārī 'valī' kī niyārī 'qulī' kī dulārī

ḳhudā-e-suḳhan 'mīr' ke soz-e-pinhāñ kī maiñ rāzdāñ huuñ

vo dīvān-e-ġhālib vo shahkār-e-taḳhlīq-e-ādam

magar us kā har sher kahtā hai paiham

maiñ urdu zabāñ huuñ

vo 'iqbāl' jo azmat-e-ādamiyyat kā paiġhāmbar hai

lahū ke jumūd aur dil ke taġhāful kā jo nauhagar hai

vo jis kī nazar bāl-e-jibrīl kī ham-safar hai

vo jis kī sadā ḳhvāb-e-ġhaflat meñ bad-mast insāniyat ke liye ek bāñg-e-darā hai

vo jis kī ḳhudī daur-e-hāzir kī fir.auniyat ke liye bahr-e-qulzum ke sāhil pe zarb-e-kalīmī kī nemul-badal hai

vo jis ne dayār-e-ġhazal se lab-o-āriz-o-zulf jaise anāsir ko bāhar nikālā

vo 'iqbāl' bhī merī zulfoñ kā qaidī rahā hai

maiñ urdu zabāñ huuñ

vo 'āzād' āzādi-e-hind kā ek āshiq

vo 'āzād' jis kī fuġhāñ soz-o-mastī

vo 'āzād' jis kī sadā sāz-e-hastī

vo 'āzād' jis kā suḳhan qaul-e-faisal

magar qaul-e-faisal kā ye faisla hai

maiñ urdu zabāñ huuñ

maiñ tārīḳh-o-tahzīb-e-hindostāñ huuñ

maiñ hindostānī huuñ rashk-e-jahāñ huuñ

jahān-e-mohabbat kī maiñ pāsbāñ huuñ

magar pāsbān-e-vatan mujh ko ġhaddār kahne lage haiñ

to ġhaddār kahne kā matlab musalmāñ huuñ maiñ bhī

musalmān ya.anī ki dahshat jihālat ġhalāzat kī pahchān huuñ maiñ

ye pahchān merī ajab sāneha hai

magar sāneha mādar-e-hind kā hai ye merā nahīñ hai

maiñ kuchh bhī nahīñ huuñ

mujhe āryāoñ ne paalā

mirī asl hindostāñ hai

maiñ hindostānī huuñ hindostāñ huuñ

magar mere ahl-e-vatan mujh ko ġhaddār kahne lage haiñ

ba-zāhir to hai garche ye merī zillat

magar asl meñ mādar-e-hind kī hī ye ismat-darī hai

maiñ urdu zabāñ huuñ

mujhe āryāoñ ne paalā

mirī asl hindostāñ hai

main urdu zaban hun

mujhe aaryaon ne pala

meri asl hindostan hai

ki mere lahu se hi wedon ki aayat likkhi gai hain

ye ram aur sita ki azmat ke qisse ramayan-kathaen

krishan aur radha ke rangin fasane

har ek lafz ki ruh naghma-sara hai

main urdu zaban hun

wo gautam ki jis ne mohabbat ki paighambari se jahannam ko jannat banaya

magar kis zaban mein

zara sochiye kis zaban mein

wo pali jo mere gharane ki pali hui thi

main urdu zaban hun

mujhe dekhna chahte ho to aao

ajanta elora ke ghaaron mein dekho

ye main hun

mera husn meri kashish hai abad tak

mujhe dekhna chahte ho to aao

ashoka ki laTon mein kanda huruf-e-muqaddas mein dekho

ye main hun

sadaqat adalat ki tahrir-e-mohkam

main urdu zaban hun

mohabbat ki man-mohni dastan hun

meri wusaten be-karan hain

ye uttar ye dakhkhin ye purab ye pachchhim

har ek samt mere nishan hain

deccan jo kabhi rang-o-harf-o-ada aur chang-o-sada se bana ek qaus-e-quzah tha

tumhein kuchh KHabar hai wo kya silsila tha

muarriKH se puchho wo mera hi jadu mera moajiza tha

main 'KHusraw' ki pyari 'wali' ki niyari 'quli' ki dulari

KHuda-e-suKHan 'mir' ke soz-e-pinhan ki main raazdan hun

wo diwan-e-ghaalib wo shahkar-e-taKHliq-e-adam

magar us ka har sher kahta hai paiham

main urdu zaban hun

wo 'iqbaal' jo azmat-e-adamiyyat ka paighambar hai

lahu ke jumud aur dil ke taghaful ka jo nauhagar hai

wo jis ki nazar baal-e-jibril ki ham-safar hai

wo jis ki sada KHwab-e-ghaflat mein bad-mast insaniyat ke liye ek bang-e-dara hai

wo jis ki KHudi daur-e-hazir ki firauniyat ke liye bahr-e-qulzum ke sahil pe zarb-e-kalimi ki nemul-badal hai

wo jis ne dayar-e-ghazal se lab-o-ariz-o-zulf jaise anasir ko bahar nikala

wo 'iqbaal' bhi meri zulfon ka qaidi raha hai

main urdu zaban hun

wo 'azad' aazadi-e-hind ka ek aashiq

wo 'azad' jis ki fughan soz-o-masti

wo 'azad' jis ki sada saz-e-hasti

wo 'azad' jis ka suKHan qaul-e-faisal

magar qaul-e-faisal ka ye faisla hai

main urdu zaban hun

main tariKH-o-tahzib-e-hindostan hun

main hindostani hun rashk-e-jahan hun

jahan-e-mohabbat ki main pasban hun

magar pasban-e-watan mujh ko ghaddar kahne lage hain

to ghaddar kahne ka matlab musalman hun main bhi

musalman yani ki dahshat jihaalat ghalazat ki pahchan hun main

ye pahchan meri ajab saneha hai

magar saneha madar-e-hind ka hai ye mera nahin hai

main kuchh bhi nahin hun

mujhe aaryaon ne pala

meri asl hindostan hai

main hindostani hun hindostan hun

magar mere ahl-e-watan mujh ko ghaddar kahne lage hain

ba-zahir to hai garche ye meri zillat

magar asl mein madar-e-hind ki hi ye ismat-dari hai

main urdu zaban hun

mujhe aaryaon ne pala

meri asl hindostan hai