main use waqif-e-ulfat na karun

sochtā huuñ ki bahut sāda-o-māsūm hai vo

maiñ abhī us ko shanāsā-e-mohabbat na karūñ

ruuh ko us kī asīr-e-ġham-e-ulfat na karūñ

us ko rusvā na karūñ vaqf-e-musībat na karūñ

sochtā huuñ ki abhī rañj se āzād hai vo

vāqif-e-dard nahīñ ḳhūgar-e-ālām nahīñ

sahar-e-aish meñ us kī asar-e-shām nahīñ

zindagī us ke liye zahr bharā jaam nahīñ

sochtā huuñ ki mohabbat hai javānī kī ḳhizāñ

us ne dekhā nahīñ duniyā meñ bahāroñ ke sivā

nikhat-o-nūr se labrez nazāroñ ke sivā

sabza-zāroñ ke sivā aur sitāroñ ke sivā

sochtā huuñ ki ġham-e-dil na sunā.ūñ us ko

sāmne us ke kabhī raaz ko uryāñ na karūñ

ḳhalish-e-dil se use dast-o-garebāñ na karūñ

us ke jazbāt ko maiñ sho.ala-ba-dāmāñ na karūñ

sochtā huuñ ki jalā degī mohabbat us ko

vo mohabbat kī bhalā taab kahāñ lā.egī

ḳhud to vo ātish-e-jazbāt meñ jal jā.egī

aur duniyā ko is anjām pe taḌpā.egī

sochtā huuñ ki bahut sāda-o-māsūm hai vo

maiñ use vāqif-e-ulfat na karūñ

sochta hun ki bahut sada-o-masum hai wo

main abhi us ko shanasa-e-mohabbat na karun

ruh ko us ki asir-e-gham-e-ulfat na karun

us ko ruswa na karun waqf-e-musibat na karun

sochta hun ki abhi ranj se aazad hai wo

waqif-e-dard nahin KHugar-e-alam nahin

sahar-e-aish mein us ki asar-e-sham nahin

zindagi us ke liye zahr bhara jam nahin

sochta hun ki mohabbat hai jawani ki KHizan

us ne dekha nahin duniya mein bahaaron ke siwa

nikhat-o-nur se labrez nazaron ke siwa

sabza-zaron ke siwa aur sitaron ke siwa

sochta hun ki gham-e-dil na sunaun us ko

samne us ke kabhi raaz ko uryan na karun

KHalish-e-dil se use dast-o-gareban na karun

us ke jazbaat ko main shoala-ba-daman na karun

sochta hun ki jala degi mohabbat us ko

wo mohabbat ki bhala tab kahan laegi

KHud to wo aatish-e-jazbaat mein jal jaegi

aur duniya ko is anjam pe taDpaegi

sochta hun ki bahut sada-o-masum hai wo

main use waqif-e-ulfat na karun