main wafa ka saudagar

maiñ vafā kā saudāgar

luT ke dasht-o-sahrā se

bastiyoñ meñ aayā huuñ

ḳhvāb-hā-e-armāñ haiñ

yā kuchh ashk ke qatre

zeb-e-tarf-e-mizhgāñ haiñ

jaane kab Dhalak jaa.eñ

taar taar pairāhan

hai lahū meñ tar lekin

jāma-zebī-e-ulfat

laaj tere hāthoñ hai

ik hujūm āñkhoñ kā

chīḳhte savāloñ kā

har jagah hai istāda

maiñ hayāt kā mujrim

aarzū kā mulzim huuñ

koī valvala haijāñ

koī ziist kā armāñ

kuchh nahīñ mire dil meñ

ai hujūm-e-be-pāyāñ

maiñ darīda-pairāhan

sach hai terī bastī meñ

nañg-e-pārsā.ī huuñ

vaj.h-e-sañg-sārī huuñ!

main wafa ka saudagar

luT ke dasht-o-sahra se

bastiyon mein aaya hun

KHwab-ha-e-arman hain

ya kuchh ashk ke qatre

zeb-e-tarf-e-mizhgan hain

jaane kab Dhalak jaen

tar tar pairahan

hai lahu mein tar lekin

jama-zebi-e-ulfat

laj tere hathon hai

ek hujum aankhon ka

chiKHte sawalon ka

har jagah hai istada

main hayat ka mujrim

aarzu ka mulzim hun

koi walwala haijaan

koi zist ka arman

kuchh nahin mere dil mein

ai hujum-e-be-payan

main darida-pairahan

sach hai teri basti mein

nang-e-parsai hun

wajh-e-sang-sari hun!