majburi

samajhnā chāhiye majbūriyāñ ahl-e-chaman ko sabz beloñ kī

numū muhtāj hai jin kī hamesha ik sahāre kī

daraḳhtoñ ke tane dīvār phāTak yā muñDereñ hoñ

panaptī haiñ sahāroñ par to ye sarsabz rahtī haiñ

sahāre chhūT jaa.eñ gar

to phir jiine kī majbūrī

kisī nemul-badal ko DhūñD letī hai

vagarna un kī shādābī ḳhizāñ kī nazr hotī hai

mohabbat uns chāhat bhī inhīñ kamzor beloñ ke mushābah haiñ

unheñ bhī ham-navāoñ ham-nashīnoñ ke sahāroñ kī zarūrat hai

sahārā chhūT jaa.e

to unheñ bhī zinda rahne ke liye

nemul-badal darkār hotā hai

nahīñ to bin sahāre dostī rishte marāsim uns chāhat aur ta.alluq

kī ye komal sabz beleñ sab ḳhizāñ kī nazar hoñ

aur vaqt se pahle hī mar jaa.eñ

samajhna chahiye majburiyan ahl-e-chaman ko sabz belon ki

numu muhtaj hai jin ki hamesha ek sahaare ki

daraKHton ke tane diwar phaTak ya munDeren hon

panapti hain sahaaron par to ye sarsabz rahti hain

sahaare chhuT jaen gar

to phir jine ki majburi

kisi nemul-badal ko DhunD leti hai

wagarna un ki shadabi KHizan ki nazr hoti hai

mohabbat uns chahat bhi inhin kamzor belon ke mushabah hain

unhen bhi ham-nawaon ham-nashinon ke sahaaron ki zarurat hai

sahaara chhuT jae

to unhen bhi zinda rahne ke liye

nemul-badal darkar hota hai

nahin to bin sahaare dosti rishte marasim uns chahat aur talluq

ki ye komal sabz belen sab KHizan ki nazar hon

aur waqt se pahle hi mar jaen