makashafa

suno agar tum ḳhatm karnā hī chāhte ho

to aadmī ko aadmī se karne vaale aadmī ko ḳhatm kar do

us se vo sab kuchh chhīn lo

jo tumhāre paas bahut pahle bhī nahīñ thā

aur ba.ad meñ bhī nahīñ hai

jab aag aur barf kī tāsīr ek hī hai

to donoñ kī alag alag shakl

tumheñ kyā de saktī hai

yā tum is se kyā le sakte ho

sivā.e is ke ki tum aag ko ḳhatm kar do

aur barf ko bhī ḳhatm kar do

magar jo aag aur barf tumhārī ruuh meñ kahīñ rakhī huī thī

yā to tum ne kabhī lams nahīñ kiyā

yā jo aadmī ruuh meñ rakhā huā thā

use to tum ne kabhī nahīñ chhuā

phir mālūm nahīñ us kā kaun sā jism

tumhāre haath lagā

ki tum ne us ke TukḌe TukḌe kar ke

use rishtoñ meñ taqsīm kar diyā

maañ baap beTā beTī bhaa.ī bahan

aur un par hukūmat karne vaale

badtarīn mahkūm bhī tum hī nikle

ya.anī kisī maañ baap ne

apne beTe aur beTī kī aag ko janm de ke

kabhī is par ghaḌī-bhar sar rakh ke sonā chāhā

to use sone nahīñ diyā gayā

phir jab bhaa.ī bahan alag alag

apnī aag aur barf kī tijārat ko nikle

to is meñ aadmī hī shāmil nahīñ thā

yā shāyad aadmī kā hī naam ḳhasāra rakhā gayā

phir bhī jab tumhārā bisāt bhar honā hī

tumhārā muqaddar Thahrā

to yaad karo ki vo tum hī the yā tum nahīñ the

yā jise ḳhudā ke āḳhirī javāb meñ

āvāz dī ga.ī pukārā gayā

is se baḌh ke bhī koī dukh kyā ho saktā hai ki

bichhḌī huī zindagī ke bichhḌe hue peḌ yaad na raheñ

phir bhī zarā muḌ ke dekho to sahī

ki kahīñ sūraj savā-neze pe to nahīñ aa chukā

kā.enāt kahāñ hai

zamīn to kā.enāt se ḳhālī hai

binā kā.enāt ke bhī koī zamīn zamīn ho saktī hai

binā sūraj ke bhī koī dhuup dhuup ho saktī hai

binā chāñd ke bhī koī chāñdnī chāñdnī ho saktī hai

ya.anī koī din din nahīñ

ya.anī koī raat raat nahīñ

ya.anī koī āb-o-havā āb-o-havā nahīñ

ya.anī koī mausam mausam nahīñ

ya.anī zamīn par zamīn hī nahīñ aur bahut kuchh hai

agar darvāza ko kholne aur band karne vaalā hī na ho to

koī khulā darvāza band darvāza se bhī ziyāda band hotā hai

koī shahr chāroñ taraf se khulā ho aur band bhī ho

to samajh lo ki is meñ rahne vaale rahte hue bhī nahīñ rahte

is meñ koī maḳhlūq rahtī hai

zamīn ke kisī mulk meñ bhī tārīḳh kī vīrānī ke sivā

koī ābād nahīñ

jab aadmī ke muñh aañkh naak aur kaan ke hote hue bhī

aadmī kī shakl nahīñ bantī

to koī āvāz āvāz hote hue bhī āvāz kaise ho saktī hai

to bolte hue bhī kaise bol saktā hai

to koī dekhte hue bhī kaise dekh saktā hai

to koī sūñghte hue bhī kaise sūñgh saktā hai

to koī sunte hue bhī kaise sun saktā hai

suno ummīd to maut ke haath meñ ek kaam hai

jise vo tumhārī gardan meñ shikanja kar ke aage hī aage chaltī chalī jaatī hai

aur tum ke us pīchhe kashāñ kashāñ khiñche chale jaate ho

magar vo duniyā to ab kahīñ nahīñ rahī

vo to tumhārī zamīn meñ yā tum meñ kahīñ gum ho ga.ī

suno agar tum KHatm karna hi chahte ho

to aadmi ko aadmi se karne wale aadmi ko KHatm kar do

us se wo sab kuchh chhin lo

jo tumhaare pas bahut pahle bhi nahin tha

aur baad mein bhi nahin hai

jab aag aur barf ki tasir ek hi hai

to donon ki alag alag shakl

tumhein kya de sakti hai

ya tum is se kya le sakte ho

siwae is ke ki tum aag ko KHatm kar do

aur barf ko bhi KHatm kar do

magar jo aag aur barf tumhaari ruh mein kahin rakhi hui thi

ya to tum ne kabhi lams nahin kiya

ya jo aadmi ruh mein rakha hua tha

use to tum ne kabhi nahin chhua

phir malum nahin us ka kaun sa jism

tumhaare hath laga

ki tum ne us ke TukDe TukDe kar ke

use rishton mein taqsim kar diya

man bap beTa beTi bhai bahan

aur un par hukumat karne wale

badtarin mahkum bhi tum hi nikle

yani kisi man bap ne

apne beTe aur beTi ki aag ko janm de ke

kabhi is par ghaDi-bhar sar rakh ke sona chaha

to use sone nahin diya gaya

phir jab bhai bahan alag alag

apni aag aur barf ki tijarat ko nikle

to is mein aadmi hi shamil nahin tha

ya shayad aadmi ka hi nam KHasara rakha gaya

phir bhi jab tumhaara bisat bhar hona hi

tumhaara muqaddar Thahra

to yaad karo ki wo tum hi the ya tum nahin the

ya jise KHuda ke aaKHiri jawab mein

aawaz di gai pukara gaya

is se baDh ke bhi koi dukh kya ho sakta hai ki

bichhDi hui zindagi ke bichhDe hue peD yaad na rahen

phir bhi zara muD ke dekho to sahi

ki kahin suraj sawa-neze pe to nahin aa chuka

kaenat kahan hai

zamin to kaenat se KHali hai

bina kaenat ke bhi koi zamin zamin ho sakti hai

bina suraj ke bhi koi dhup dhup ho sakti hai

bina chand ke bhi koi chandni chandni ho sakti hai

yani koi din din nahin

yani koi raat raat nahin

yani koi aab-o-hawa aab-o-hawa nahin

yani koi mausam mausam nahin

yani zamin par zamin hi nahin aur bahut kuchh hai

agar darwaza ko kholne aur band karne wala hi na ho to

koi khula darwaza band darwaza se bhi ziyaada band hota hai

koi shahr chaaron taraf se khula ho aur band bhi ho

to samajh lo ki is mein rahne wale rahte hue bhi nahin rahte

is mein koi maKHluq rahti hai

zamin ke kisi mulk mein bhi tariKH ki virani ke siwa

koi aabaad nahin

jab aadmi ke munh aankh nak aur kan ke hote hue bhi

aadmi ki shakl nahin banti

to koi aawaz aawaz hote hue bhi aawaz kaise ho sakti hai

to bolte hue bhi kaise bol sakta hai

to koi dekhte hue bhi kaise dekh sakta hai

to koi sunghte hue bhi kaise sungh sakta hai

to koi sunte hue bhi kaise sun sakta hai

suno ummid to maut ke hath mein ek kaam hai

jise wo tumhaari gardan mein shikanja kar ke aage hi aage chalti chali jati hai

aur tum ke us pichhe kashan kashan khinche chale jate ho

magar wo duniya to ab kahin nahin rahi

wo to tumhaari zamin mein ya tum mein kahin gum ho gai