man arafa nafsahu

raushnī kī ek nannhī sī lakīr

mere kamre ke añdhere kā badan

chupke chupke TaToltī hai

jis tarah habshī hasīna ke Dhale

sandal ke se

ābnūsī jism ke a.asāb meñ

tez suuī kī achānak ik chubhan

sarsarāte saañp kī mānind dauḌātī hai ḳhuuñ

jhanjhanā uThte haiñ saare tār-o-pū

aur phir āhista āhista kahīñ

zer-e-sat.h-e-jān-o-dil

ye talātum

ruk ke so jaatā hai

ya.anī

azhdar-e-āsūda-ḳhātir kī tarah

ḳhvāb-noshīñ ke uḌātā hai maze

phir bhī lekin

ik ġhubār-e-intizār

mere kamre kī fazā meñ

misl-e-āb-e-siyāh raushan hai

jaise tārīkī ḳhud apnī tah tak

pahuñchne ko bechain ho

is liye

raushnī kī is añgusht-e-be-rahm kā

ḳhair-maqdam kare

azhdar-e-āsūda-ḳhātir ko jagā.e

dard ye hai

mere kamre kā añdherā kabhī ik baar musaḳhḳhar nahīñ ho paatā

naqsh-e-tārīk munavvar nahīñ hone paatā

koī gosha

kabhī raushan

kahīñ gosha koī

ujle kapḌoñ kī qatāroñ se laTakte hue injīr ke ḳhoshe

raakh ke Dher

ġhalāzat ke kueñ

sone chāñdī ke damakte hue phal

raushnī

yā tez suuī

yā talātum

jo bhī ho tum

tīrgī ko is tarah se munqasim

tum jo kar dete ki dīvāroñ kā rañg

saaf khil uThtā to apne ko bhī in meñ mun.akis maiñ dekh letā

raushni ki ek nannhi si lakir

mere kamre ke andhere ka badan

chupke chupke TaTolti hai

jis tarah habshi hasina ke Dhale

sandal ke se

aabnusi jism ke aasab mein

tez sui ki achanak ek chubhan

sarsaraate sanp ki manind dauDati hai KHun

jhanjhana uThte hain sare tar-o-pu

aur phir aahista aahista kahin

zer-e-sath-e-jaan-o-dil

ye talatum

ruk ke so jata hai

yani

azhdar-e-asuda-KHatir ki tarah

KHwab-noshin ke uData hai maze

phir bhi lekin

ek ghubar-e-intizar

mere kamre ki faza mein

misl-e-ab-e-siyah raushan hai

jaise tariki KHud apni tah tak

pahunchne ko bechain ho

is liye

raushni ki is angusht-e-be-rahm ka

KHair-maqdam kare

azhdar-e-asuda-KHatir ko jagae

dard ye hai

mere kamre ka andhera kabhi ek bar musaKHKHar nahin ho pata

naqsh-e-tarik munawwar nahin hone pata

koi gosha

kabhi raushan

kahin gosha koi

ujle kapDon ki qataron se laTakte hue injir ke KHoshe

rakh ke Dher

ghalazat ke kuen

sone chandi ke damakte hue phal

raushni

ya tez sui

ya talatum

jo bhi ho tum

tirgi ko is tarah se munqasim

tum jo kar dete ki diwaron ka rang

saf khil uThta to apne ko bhi in mein munakis main dekh leta