manafi shuur ka ek waraq

kyā is nizām ko jagīr-dār badlegā?

jo

mere vote se muntaḳhab hotā hai

aur

mere ḳhvāboñ par tex lagātā hai

kyā

is nizām ko sarmāya-dār badlegā?

jo

mujh se baara ghanTe kī begār letā hai

magar

aaTh ghanTe kī ujrat dene par bhī tayyār nahīñ!

kyā dānish-var is nizām ko badal saktā hai?

magar vo to

ek plot yā ġhair-mulkī daure ke evaz

hukmarānoñ ke liye luġhat meñ se satā.ishī alfāz

jam.a kartā rahtā hai!

tājir is nizām ko kaise badlegā?

vo to bajaT kī tamām murā.āt sameT kar

saarī mahñgā.ī

mere khāte meñ darj kar detā hai

siyasat-dān is nizām kā muhāfiz kyuuñ na ho!

ki us kī barkat se

vo sarkārī schōl aur dispensary meñ apnī bhaiñs bāñdh saktā hai

aur

saaya dene vaale ġhair-sarkārī daraḳht ke nīche

class lene vaale ziddī teacher ko

apnī pajero se bāñdh kar ghasīTe jaane kī dhamkī detā hai

maiñ ne

sahāfī se is nizām ko badalne kī darḳhvāst kī

magar vo

thāna muharrir ke paas baiTh kar chaa.e piine aur ḳhabreñ likhne meñ magan thā

ye sab jānte hue

maiñ agle pāñch saal ke liye

apnā chehrā apne halqe ke paTvārī ko de dūñgā

jo use

aks-e-shajra meñ lapeT kar rakh legā

aur

vote kī parchī par merā añgūThā ḳhud hī lagā legā

kya is nizam ko jagir-dar badlega?

jo

mere wote se muntaKHab hota hai

aur

mere KHwabon par tex lagata hai

kya

is nizam ko sarmaya-dar badlega?

jo

mujh se bara ghanTe ki begar leta hai

magar

aaTh ghanTe ki ujrat dene par bhi tayyar nahin!

kya danish-war is nizam ko badal sakta hai?

magar wo to

ek plot ya ghair-mulki daure ke ewaz

hukmaranon ke liye lughat mein se sataishi alfaz

jama karta rahta hai!

tajir is nizam ko kaise badlega?

wo to bajaT ki tamam muraat sameT kar

sari mahngai

mere khate mein darj kar deta hai

siyasat-dan is nizam ka muhafiz kyun na ho!

ki us ki barkat se

wo sarkari school aur dispensary mein apni bhains bandh sakta hai

aur

saya dene wale ghair-sarkari daraKHt ke niche

class lene wale ziddi teacher ko

apni pajero se bandh kar ghasiTe jaane ki dhamki deta hai

main ne

sahafi se is nizam ko badalne ki darKHwast ki

magar wo

thana muharrir ke pas baiTh kar chae pine aur KHabren likhne mein magan tha

ye sab jaante hue

main agle panch sal ke liye

apna chehra apne halqe ke paTwari ko de dunga

jo use

aks-e-shajra mein lapeT kar rakh lega

aur

wote ki parchi par mera anguTha KHud hi laga lega