mannat

ek hī saal huā hai sabhī vaisā hī hai

aur tire mere sivā shahr meñ badlā kyā hai

vahī saḌkeñ vahī galiyāñ vahī raste saare

vahī hotel vahī Thele vahī phūloñ kī dukāñ

aur kuchh der zarā ruk ke agar dekheñ to

āte-jāte hue sab log shanāsā hī lageñ

āThoñ bāzār mazāfāt ko ruḳhsat kartā

ghanTa-ghar aaj bhī istāda o masrūf vahīñ

aaTh bāzāroñ ke izhdihām se bāhar aa kar

vahī dargāh kī dīvār se lipTā pīpal

jis kī shāḳhoñ se bañdhe lākhoñ hazāroñ dhāge

yaad hai pichhle baras

ham ne bhī bāñdhī thī vahīñ

sabz dhāge meñ piroī huī mannat koī

usī mannat ke hare dhāge ko aadhā karke

tum ne bāñdhā thā mirī zard kalā.ī par bhī

tum ko mā'lūm hai

yā tum ne sunā to hogā

vo jo dargāh vahāñ hotī thī

ab bhī hai vahīñ

usī dīvār se lipTā vo muqaddas pīpal

us kī jis shāḳh pe mannat kī girah bāñdhī thī

mire baazū kī tarah

suukh ga.ī hai vo bhī

ek hi sal hua hai sabhi waisa hi hai

aur tere mere siwa shahr mein badla kya hai

wahi saDken wahi galiyan wahi raste sare

wahi hotel wahi Thele wahi phulon ki dukan

aur kuchh der zara ruk ke agar dekhen to

aate-jate hue sab log shanasa hi lagen

aaThon bazar mazafat ko ruKHsat karta

ghanTa-ghar aaj bhi istada o masruf wahin

aaTh bazaron ke izhdiham se bahar aa kar

wahi dargah ki diwar se lipTa pipal

jis ki shaKHon se bandhe lakhon hazaron dhage

yaad hai pichhle baras

hum ne bhi bandhi thi wahin

sabz dhage mein piroi hui mannat koi

usi mannat ke hare dhage ko aadha karke

tum ne bandha tha meri zard kalai par bhi

tum ko ma'lum hai

ya tum ne suna to hoga

wo jo dargah wahan hoti thi

ab bhi hai wahin

usi diwar se lipTa wo muqaddas pipal

us ki jis shaKH pe mannat ki girah bandhi thi

mere bazu ki tarah

sukh gai hai wo bhi