manzil ke nam

kaise khīñchūñ tirī tasvīr tū gum hai ab tak

tujh ko ai jān-e-jahāñ maiñ ne to dekhā bhī nahīñ

jab kabhī abr shab-e-mah meñ uḌā jaatā hai

ābshāroñ se sadā aatī hai chhan-chhan ke kahīñ

yā kabhī shaam kī tārīkī meñ tanhā.ī meñ

jab kabhī jalva jhalaktā hai tirī yādoñ kā

maiñ sajātā huuñ ḳhayāloñ meñ hasīñ ḳhvāb koī

sāmne aatī hai do pal ke liye tū ai dost

aur ai parda-nashīñ terā jo chilman hai hasīñ

maiñ baḌhātā huuñ qadam us ko haTāne ke liye

nā-gahāñ duur se āvāz koī aatī hai

kaañp jaatā hai, dhaḌaktā hai merā shīsha-e-dil

aur phir dhundlī fazāoñ meñ tū kho jaatī hai

dekhtā huuñ jo maiñ muḌ kar ki pas-e-pusht hai kaun

yaas ke bahr-e-siyah-posh pe raqsāñ raqsāñ

zahr-ālūd tabassum kī kaTāreñ le kar

koī lahrātā huā saayā nazar aatā hai

kaise khinchun teri taswir tu gum hai ab tak

tujh ko ai jaan-e-jahan main ne to dekha bhi nahin

jab kabhi abr shab-e-mah mein uDa jata hai

aabshaaron se sada aati hai chhan-chhan ke kahin

ya kabhi sham ki tariki mein tanhai mein

jab kabhi jalwa jhalakta hai teri yaadon ka

main sajata hun KHayalon mein hasin KHwab koi

samne aati hai do pal ke liye tu ai dost

aur ai parda-nashin tera jo chilman hai hasin

main baDhata hun qadam us ko haTane ke liye

na-gahan dur se aawaz koi aati hai

kanp jata hai, dhaDakta hai mera shisha-e-dil

aur phir dhundli fazaon mein tu kho jati hai

dekhta hun jo main muD kar ki pas-e-pusht hai kaun

yas ke bahr-e-siyah-posh pe raqsan raqsan

zahr-alud tabassum ki kaTaren le kar

koi lahraata hua saya nazar aata hai