manzil

maiñ rangoñ meñ huuñ kabhī brush meñ

kabhī canvas pe sajī huuñ maiñ

maiñ qaus-e-quzah huuñ hurūf kī

alfāz kī ik laḌī huuñ maiñ

mujhe ḳhud bhī apnā patā nahīñ

maiñ kahāñ nahīñ aur kahāñ huuñ maiñ

ab talāsh karne se fā.eda

maiñ jo mil bhī jā.ūñ to kyā bhalā

phir bhī ek ḳhalish sī hai

terī justujū sub.h shaam hai

ye jo ḳhvāhisheñ haiñ fuzūl sī

ik 'umr se mire saath haiñ

jo maiñ dāman in se chhuḌā sakūñ

to sukūñ tasavvuf meñ pā sakūñ

magar shaffāf parde tasavvuf ke haiñ

mujhe kis tarah se chhupā.eñge

mujhe qaid karnā muhāl hai

maiñ magan huuñ apnī hī zaat meñ

kaun-o-makāñ se be-ḳhabar

mujhe aarzū thī kabhī mile

koī rāz-dāñ koī ham-navā

magar kabhī koī aisā milā nahīñ

jahāñ ro sakūñ kabhī rakh ke sar

jo milā vo apnā hī kāñdhā hai

jahāñ roTī huuñ maiñ jhukā ke sar

maiñ muhīb raat kā pahar huuñ

nahīñ sahar mere nasīb meñ

ye sahar terī hai to rakh ise

maiñ to sahar se bahut duur huuñ

maiñ na haath ab kabhī ā.ūñgī

mujhe DhūñDhnā bhī fuzūl hai

ye jo rāste haiñ chahār-sū

le jā.eñge mujhe kū-ba-kū

bahut manzileñ haiñ yahāñ vahāñ

merī manzil in meñ

koī nahīñ

haañ merī manzil nahīñ koī

maiñ to apnī manzil aap huuñ

main rangon mein hun kabhi brush mein

kabhi canwas pe saji hun main

main qaus-e-quzah hun huruf ki

alfaz ki ek laDi hun main

mujhe KHud bhi apna pata nahin

main kahan nahin aur kahan hun main

ab talash karne se faeda

main jo mil bhi jaun to kya bhala

phir bhi ek KHalish si hai

teri justuju subh sham hai

ye jo KHwahishen hain fuzul si

ek 'umr se mere sath hain

jo main daman in se chhuDa sakun

to sukun tasawwuf mein pa sakun

magar shaffaf parde tasawwuf ke hain

mujhe kis tarah se chhupaenge

mujhe qaid karna muhaal hai

main magan hun apni hi zat mein

kaun-o-makan se be-KHabar

mujhe aarzu thi kabhi mile

koi raaz-dan koi ham-nawa

magar kabhi koi aisa mila nahin

jahan ro sakun kabhi rakh ke sar

jo mila wo apna hi kandha hai

jahan roTi hun main jhuka ke sar

main muhib raat ka pahar hun

nahin sahar mere nasib mein

ye sahar teri hai to rakh ise

main to sahar se bahut dur hun

main na hath ab kabhi aaungi

mujhe DhunDhna bhi fuzul hai

ye jo raste hain chahaar-su

le jaenge mujhe ku-ba-ku

bahut manzilen hain yahan wahan

meri manzil in mein

koi nahin

han meri manzil nahin koi

main to apni manzil aap hun