maqtal ki bazdid

balā kī pyaas us kī aañkh meñ hai

hijāz kī sarzamīñ pe is saal is qadar bārisheñ huī haiñ ki ḳhushk tālāb

ḳhūn-e-nāhaq se bhar ga.e haiñ

lahū kī pyaas us kī aañkh meñ hai

nafas meñ bārūd jis kī qātil sadā kā sho.ala

qadam qadam tahniyat ke raste ravāñ huā to vo naḳhl jis kī jaḌeñ zamīnoñ ke

dard meñ thiiñ

jhukā kuchh aise ki jaise hāl-e-rukūa meñ ho

udaas taa.ir jo shāḳh par the

jo gumbadoñ kī panāh meñ the

jo jāliyoñ ke tavāf meñ the

Dare hue āsmān-e-hijrat kī Tahniyoñ se

nasheb meñ us zamīn-e-maqtal ko dekhte haiñ

jahāñ vo naḳhl is tarah girā hai ki jaise hāl-e-sujūd meñ ho

ik aur tālāb taaza bārish se bhar gayā hai

bala ki pyas us ki aankh mein hai

hijaz ki sarzamin pe is sal is qadar barishen hui hain ki KHushk talab

KHun-e-nahaq se bhar gae hain

lahu ki pyas us ki aankh mein hai

nafas mein barud jis ki qatil sada ka shoala

qadam qadam tahniyat ke raste rawan hua to wo naKHl jis ki jaDen zaminon ke

dard mein thin

jhuka kuchh aise ki jaise haal-e-rukua mein ho

udas tair jo shaKH par the

jo gumbadon ki panah mein the

jo jaliyon ke tawaf mein the

Dare hue aasman-e-hijrat ki Tahniyon se

nasheb mein us zamin-e-maqtal ko dekhte hain

jahan wo naKHl is tarah gira hai ki jaise haal-e-sujud mein ho

ek aur talab taza barish se bhar gaya hai