marg-e-soz-e-mohabbat

aao ki marg-e-soz-e-mohabbat manā.eñ ham

aao ki husn-e-māh se dil ko jalā.eñ ham

ḳhush huuñ firāq-e-qāmat-o-ruḳhsār-e-yār se

sarv-o-gul-o-saman se nazar ko satā.eñ ham

vīrānī-e-hayāt ko vīrān-tar kareñ

le nāseh aaj terā kahā maan jaa.eñ ham

phir oT le ke dāman-e-abr-e-bahār kī

dil ko manā.eñ ham kabhī aañsū bahā.eñ ham

suljhā.eñ be-dilī se ye uljhe hue savāl

vaañ jaa.eñ yā na jaa.eñ na jaa.eñ ki jaa.eñ ham

phir dil ko pās-e-zabt kī talqīn kar chukeñ

aur imtihān-e-zabt se phir jī churā.īñ ham

aao ki aaj ḳhatm huī dāstān-e-ishq

ab ḳhatm-e-āshiqī ke fasāne sunā.eñ ham

aao ki marg-e-soz-e-mohabbat manaen hum

aao ki husn-e-mah se dil ko jalaen hum

KHush hun firaq-e-qamat-o-ruKHsar-e-yar se

sarw-o-gul-o-saman se nazar ko sataen hum

virani-e-hayat ko viran-tar karen

le naseh aaj tera kaha man jaen hum

phir oT le ke daman-e-abr-e-bahaar ki

dil ko manaen hum kabhi aansu bahaen hum

suljhaen be-dili se ye uljhe hue sawal

wan jaen ya na jaen na jaen ki jaen hum

phir dil ko pas-e-zabt ki talqin kar chuken

aur imtihan-e-zabt se phir ji churain hum

aao ki aaj KHatm hui dastan-e-ishq

ab KHatm-e-ashiqi ke fasane sunaen hum