marg-pech

mujh ko apnī maut kī dastak ne zinda kar diyā hai

dauḌtā phirtā huuñ

saare kaam nipTāne kī jaldī hai

pahāḌoñ aur jhīloñ kī ḳhamoshī se

qadīmī giit sunñe haiñ purāne dāstānī bhed lene haiñ

daraḳhtoñ se numū-kārī kī bābat pūchhnā hai

nit-na.ī shakleñ banāte bādaloñ ko dekhnā hai

ḳhush-navā achchhe parindoñ se

uḌan-phal kā patā ma.alūm karnā hai

urūsī bel ke phūloñ ko chhūnā hai

dar-o-dīvār se bāteñ bhī karnī haiñ

abhī kitne mulāqī muntazir haiñ

ek lambī list hai āñkhoñ meñ nādīda nazāroñ kī

fishār-e-ḳhūn baḌhtā jā rahā hai

ab kisī lamhe rageñ phaTne kā ḳhatra hai

magar masrūf huuñ sab kaam nipTāne kī jaldī hai

samundar ne bulāyā hai

jazīre aur sāhil bhī

ka.ī qarnoñ se mujh ko yaad karte haiñ

machhere giit gaate bastiyoñ ko lauTte

mujh ko bahut hī haañT karte haiñ

kisī din jā.ūñgā milne

ḳhazānoñ ko ugalne ke liye

betāb haiñ raqbe tilismī sar-zamīnoñ ke

safar ke rāste ma.alūm haiñ

naqshe purāne kaaTh ke sandūq meñ mahfūz haiñ sab

dev baanī bhī samajhtā huuñ

magar masrūf huuñ

bachchoñ ke kitne kaam baaqī haiñ

kitābeñ copiyāñ schōl ke kapḌe na.e baste

khilaune baT rocket

aur bahut sī an-kahī chīzeñ

ḳharīdūñgā to ḳhush hoñge

magar masrūf huuñ sab kaam nipTāne kī jaldī hai

ragoñ meñ ḳhuun kī raftār baḌhtī jā rahī hai

zindagī par ik junūn-e-marg taarī hai

bahut masrūf huuñ

sarpaT likhe jaatā huuñ nazmeñ

mujh ko apnī maut kī dastak ne zinda kar diyā hai!!

mujh ko apni maut ki dastak ne zinda kar diya hai

dauDta phirta hun

sare kaam nipTane ki jaldi hai

pahaDon aur jhilon ki KHamoshi se

qadimi git sunne hain purane dastani bhed lene hain

daraKHton se numu-kari ki babat puchhna hai

nit-nai shaklen banate baadalon ko dekhna hai

KHush-nawa achchhe parindon se

uDan-phal ka pata malum karna hai

urusi bel ke phulon ko chhuna hai

dar-o-diwar se baaten bhi karni hain

abhi kitne mulaqi muntazir hain

ek lambi list hai aankhon mein nadida nazaron ki

fishaar-e-KHun baDhta ja raha hai

ab kisi lamhe ragen phaTne ka KHatra hai

magar masruf hun sab kaam nipTane ki jaldi hai

samundar ne bulaya hai

jazire aur sahil bhi

kai qarnon se mujh ko yaad karte hain

machhere git gate bastiyon ko lauTte

mujh ko bahut hi hanT karte hain

kisi din jaunga milne

KHazanon ko ugalne ke liye

betab hain raqbe tilismi sar-zaminon ke

safar ke raste malum hain

naqshe purane kaTh ke sanduq mein mahfuz hain sab

dew bani bhi samajhta hun

magar masruf hun

bachchon ke kitne kaam baqi hain

kitaben copiyan school ke kapDe nae baste

khilaune baT rocket

aur bahut si an-kahi chizen

KHaridunga to KHush honge

magar masruf hun sab kaam nipTane ki jaldi hai

ragon mein KHun ki raftar baDhti ja rahi hai

zindagi par ek junun-e-marg tari hai

bahut masruf hun

sarpaT likhe jata hun nazmen

mujh ko apni maut ki dastak ne zinda kar diya hai!!