marhum bachche ki yaad

aaj apnī āḳhirī manzil pe hai fikr-e-rasā

aaj āḳhir uqda-e-zauq-e-suḳhan vā ho gayā

kyā ḳhabar thī haa.e aisā bhī zamāna aa.egā

ek din kahnā paḌegā laḳht-e-dil kā marsiya

zindagī dushvār hai be-ro.e be-mātam kiye

yā-ḳhudā shā.ir banāyā thā isī din ke liye

phuul dil kā aisā murjhāyā zarā ḳhushbū nahīñ

naam hai ārām jis kā ab kisī pahlū nahīñ

hoñ agar rone pe maa.il aañkh meñ aañsū nahīñ

zabt karnā chāheñ to jazbāt par qaabū nahīñ

kyā batā.eñ kis pareshānī meñ kis mushkil meñ haiñ

ek murjhā.e hue ġhunche ke kāñTe dil meñ haiñ

kyā karegā koī andāza hamāre haal kā

luT gayā sarmāya-e-tāb-o-tavāñ do saal kā

aag sī dil meñ lagī hai ġham hai ye kis laal kā

ashk-e-ḳhūnī hai ki sho.ala ātish-e-sayyāl kā

tan phuñkā jaatā hai lekin lab pe āh-e-sard hai

ai mire allāh mere dil meñ kaisā dard hai

aah ai ārām-e-jāñ taskīn-e-dil laḳht-e-jigar

aah ai ghar ke ujāle aah ai nūr-e-nazar

raat jangal kī udāsī har taraf tārīk ghar

chain se sonā tumhārā ho ke be-ḳhauf-o-ḳhatar

is dilerī ke tasadduq is qanā.at ke nisār

ḳhaak ke bistar pe kyūñkar aa gayā tum ko qarār

kuchh na pūchho kyā guzartī hai dil-e-nāshād par

ab madār-e-zindagī hai nāla-o-fariyād par

muztarib dil ro rahā hai mehnat-e-barbād par

ḳhuun ke aañsū nichhāvar haiñ tumhārī yaad par

kuchh hamāre haal kī tum ko ḳhabar hai yā nahīñ

kis se pūchheñ dil kī aahoñ meñ asar hai yā nahīñ

ab nazar meñ rang hī badlā huā mahfil kā hai

har nafas paiġhām goyā āḳhirī manzil kā hai

ġham shikasta-ḳhātirī kā sāmnā mushkil kā hai

zindagī kī sham.a kyā kiije ye naqsha dil kā hai

jaise ik rangīn shīshe ko kuchal kar pheñk do

yā shagufta phuul chuTkī se masal kar pheñk do

aaj apni aaKHiri manzil pe hai fikr-e-rasa

aaj aaKHir uqda-e-zauq-e-suKHan wa ho gaya

kya KHabar thi hae aisa bhi zamana aaega

ek din kahna paDega laKHt-e-dil ka marsiya

zindagi dushwar hai be-roe be-matam kiye

ya-KHuda shair banaya tha isi din ke liye

phul dil ka aisa murjhaya zara KHushbu nahin

nam hai aaram jis ka ab kisi pahlu nahin

hon agar rone pe mail aankh mein aansu nahin

zabt karna chahen to jazbaat par qabu nahin

kya bataen kis pareshani mein kis mushkil mein hain

ek murjhae hue ghunche ke kanTe dil mein hain

kya karega koi andaza hamare haal ka

luT gaya sarmaya-e-tab-o-tawan do sal ka

aag si dil mein lagi hai gham hai ye kis lal ka

ashk-e-KHuni hai ki shoala aatish-e-sayyal ka

tan phunka jata hai lekin lab pe aah-e-sard hai

ai mere allah mere dil mein kaisa dard hai

aah ai aaram-e-jaan taskin-e-dil laKHt-e-jigar

aah ai ghar ke ujale aah ai nur-e-nazar

raat jangal ki udasi har taraf tarik ghar

chain se sona tumhaara ho ke be-KHauf-o-KHatar

is dileri ke tasadduq is qanaat ke nisar

KHak ke bistar pe kyunkar aa gaya tum ko qarar

kuchh na puchho kya guzarti hai dil-e-nashad par

ab madar-e-zindagi hai nala-o-fariyaad par

muztarib dil ro raha hai mehnat-e-barbaad par

KHun ke aansu nichhawar hain tumhaari yaad par

kuchh hamare haal ki tum ko KHabar hai ya nahin

kis se puchhen dil ki aahon mein asar hai ya nahin

ab nazar mein rang hi badla hua mahfil ka hai

har nafas paigham goya aaKHiri manzil ka hai

gham shikasta-KHatiri ka samna mushkil ka hai

zindagi ki shama kya kije ye naqsha dil ka hai

jaise ek rangin shishe ko kuchal kar phenk do

ya shagufta phul chuTki se masal kar phenk do