mariz-e-mohabbat

apne pindār-e-ḳhudī se munfa.il huuñ 'maz.harī'

maiñ zuhūr-e-iḳhtilāl-e-āb-o-gil huuñ 'maz.harī'

ki mohabbat kā marīz-e-mustaqil huuñ 'maz.harī'

dostī kyā dushmanī se bhī mohabbat maiñ ne kī

raushnī kyā tīrgī se bhī mohabbat maiñ ne kī

muskurā.ī tīrgī mujh ko mohabbat ho ga.ī

hañs ke bolī dushmanī mujh ko mohabbat ho ga.ī

muflisī o be-navā.ī se mohabbat maiñ ne kī

har surūr-e-ḳhud-numā.ī se mohabbat maiñ ne kī

har ġhurūr-e-kibriyā.ī se mohabbat maiñ ne kī

be-ruḳhī o kaj-adā.ī se mohabbat maiñ ne kī

tar-zabāñ ho kar rukhā.ī se mohabbat maiñ ne kī

thā rajā.ī kis qadar merī mohabbat kā dimāġh

ahrman ke sīna-e-tārīk meñ dekhā charāġh

ik sitāristāñ nazar aayā añdherā daaġh daaġh

maiñ ne makkārī o ayyārī meñ bhī dekhā ḳhulūs

maiñ sayyādī o jallādī se bhī bartā ḳhulūs

maiñ ne qahhārī o jabbārī meñ bhī DhūñDā ḳhulūs

apne is jazbe ko ik tashdīd-e-īmānī bhī dī

dostoñ ke vāste īmāñ kī qurbānī bhī dī

taaki puurī ho mohabbat kī ik ummīd-e-fuzūl

bār-hā jhoñkā kiyā insāf kī āñkhoñ meñ dhuul

phir bhī sab kuchh kho ke sab kuchh de ke kuchh paayā nahīñ

aql kaam aa.ī nahīñ aur ishq raas aayā nahīñ

jis ko kahte haiñ vafā ik saḳht bīmārī hai ye

ḳhud-kushī ho yā na ho lekin ḳhud-āzārī hai ye

nāz-bardārī meñ bhī ik bār-bardārī hai ye

maiñ mohabbat kī havas meñ itnā be-ḳhud ho gayā

mere andar mādda nafrat kā bilkul so gayā

ai azīzo! is marīz-e-zindagī kā kyā ilaaj

is ḳhudī kā kyā ilaaj is be-ḳhudī kā kyā ilaaj

jis ko ho nāz-e-vafā us aadmī kā kyā ilaaj

'ijtibā' se pūchhte ho 'maz.harī' kā kyā ilaaj

sau ḳhulūs-e-be-riyā kā ik ḳhabāsat se ilaaj

ye maraz hai, ye maraz hai is kā nafrat hai ilaaj

bas yahī rāz-e-shifā hai, bas yahī rāz-e-shifā

bas yahī merī davā hai bas yahī merī davā

koī merī ruuh par aisā kare zulm-e-shadīd

mujh meñ nafrat jī uThe salavāt bar-rūh-e-yazīd

apne pindar-e-KHudi se munfail hun 'mazhari'

main zuhur-e-iKHtilal-e-ab-o-gil hun 'mazhari'

ki mohabbat ka mariz-e-mustaqil hun 'mazhari'

dosti kya dushmani se bhi mohabbat main ne ki

raushni kya tirgi se bhi mohabbat main ne ki

muskurai tirgi mujh ko mohabbat ho gai

hans ke boli dushmani mujh ko mohabbat ho gai

muflisi o be-nawai se mohabbat main ne ki

har surur-e-KHud-numai se mohabbat main ne ki

har ghurur-e-kibriyai se mohabbat main ne ki

be-ruKHi o kaj-adai se mohabbat main ne ki

tar-zaban ho kar rukhai se mohabbat main ne ki

tha rajai kis qadar meri mohabbat ka dimagh

ahrman ke sina-e-tarik mein dekha charagh

ek sitaristan nazar aaya andhera dagh dagh

main ne makkari o ayyari mein bhi dekha KHulus

main sayyaadi o jalladi se bhi barta KHulus

main ne qahhaari o jabbari mein bhi DhunDa KHulus

apne is jazbe ko ek tashdid-e-imani bhi di

doston ke waste iman ki qurbani bhi di

taki puri ho mohabbat ki ek ummid-e-fuzul

bar-ha jhonka kiya insaf ki aankhon mein dhul

phir bhi sab kuchh kho ke sab kuchh de ke kuchh paya nahin

aql kaam aai nahin aur ishq ras aaya nahin

jis ko kahte hain wafa ek saKHt bimari hai ye

KHud-kushi ho ya na ho lekin KHud-azari hai ye

naz-bardari mein bhi ek bar-bardari hai ye

main mohabbat ki hawas mein itna be-KHud ho gaya

mere andar madda nafrat ka bilkul so gaya

ai azizo! is mariz-e-zindagi ka kya ilaj

is KHudi ka kya ilaj is be-KHudi ka kya ilaj

jis ko ho naz-e-wafa us aadmi ka kya ilaj

'ijtiba' se puchhte ho 'mazhari' ka kya ilaj

sau KHulus-e-be-riya ka ek KHabasat se ilaj

ye maraz hai, ye maraz hai is ka nafrat hai ilaj

bas yahi raaz-e-shifa hai, bas yahi raaz-e-shifa

bas yahi meri dawa hai bas yahi meri dawa

koi meri ruh par aisa kare zulm-e-shadid

mujh mein nafrat ji uThe salawat bar-ruh-e-yazid