marsiya baal-ganga-dhar-tilak

maut ne raat ke parde meñ kiyā kaisā vaar

raushani-e-sub.h vatan kī hai ki mātam kā ġhubār

ma.arka sard hai soyā hai vatan kā sardār

tantana sher kā baaqī nahīñ suunā hai kachhār

bekasī chhātī hai taqdīr phirī jaatī hai

qaum ke haath se talvār girī jaatī hai

uTh gayā daulat-e-nāmūs-e-vatan kā vāris

qaum marhūm ke e.azāz-e-kuhan kā vāris

jāñ-nisār-e-azalī sher-e-Deccan kā vāris

peshvāoñ ke garajte hue ran kā vāris

thī samā.ī huī punā kī bahār āñkhoñ meñ

āḳhirī daur kā baaqī thā ḳhumār āñkhoñ meñ

maut mahrāshTra kī thī yā tirī marne kī ḳhabar

murdanī chhā ga.ī insān to kyā patthar par

pattiyāñ jhuk ga.iiñ murjhā ga.e sahrā ke shajar

rah ga.e josh meñ bahte hue dariyā tham kar

sard-o-shādāb havā ruk ga.ī kohsāroñ kī

raushnī ghaT ga.ī do-chār ghaḌī tāroñ kī

thā nigahbān-e-vatan dabdaba-e-ām tirā

na digeñ paañv pe thā qaum ko paiġhām

dil raqīboñ ke larazte the ye thā kaam terā

niiñd se chauñk paḌe sun jo liyā naam terā

yaad kar ke tujhe mazlūm-e-vatan ro.eñge

banda-e-rasm-e-jafā chain se ab so.eñge

zindagī terī bahār chamanistān-e-vafā

aabrū tere liye qaum se paimān-e-vafā

āshiq-e-nām-e-vatan kushta-e-armān-e-vafā

mard-e-maidān-e-vafā jism-e-vafā jān-e-vafā

ho ga.ī nazr-e-vatan hastī-e-fānī terī

na to piirī rahī terī na javānī terī

auj-e-himmat pe rahā terī vafā kā ḳhurshed

maut ke ḳhauf pe ġhālib rahī ḳhidmat kī umed

ban gayā qaid kā farmān bhī rāhat kī naved

hue tārīkī-e-zindāñ meñ tire baal saped

phir rahā hai mirī nazroñ meñ sarāpā terā

āh-o-qaid-e-sitam aur buḌhāpā terā

mo.ajiza ashk-e-mohabbat kā dikhāyā tū ne

ek qatra se ye tūfān uThāyā tū ne

mulk ko hastī-e-bedār banāyā tū ne

jazba-e-qaum ko jaadū ko jagāyā tū ne

ik taḌap aa ga.ī sote hue armānoñ meñ

bijliyāñ kauñd ga.iiñ qaum ke vīrānoñ meñ

laash ko terī sañvāreñ na rafīqān-e-kuhan

ho jabīñ ke liye sandal kī jagah ḳhāk-e-vatan

tar huā hai jo shahīdoñ ke lahū se dāman

deñ usī kā tujhe punjab ke mazlūm kafan

shor-e-mātam na ho jhankār ho zanjīroñ kī

chāhiye qaum ke bhisham ko chitā tīroñ kī

maut ne raat ke parde mein kiya kaisa war

raushani-e-subh watan ki hai ki matam ka ghubar

marka sard hai soya hai watan ka sardar

tantana sher ka baqi nahin suna hai kachhaar

bekasi chhati hai taqdir phiri jati hai

qaum ke hath se talwar giri jati hai

uTh gaya daulat-e-namus-e-watan ka waris

qaum marhum ke eazaz-e-kuhan ka waris

jaan-nisar-e-azali sher-e-Deccan ka waris

peshwaon ke garajte hue ran ka waris

thi samai hui puna ki bahaar aankhon mein

aaKHiri daur ka baqi tha KHumar aankhon mein

maut mahrashTra ki thi ya teri marne ki KHabar

murdani chha gai insan to kya patthar par

pattiyan jhuk gain murjha gae sahra ke shajar

rah gae josh mein bahte hue dariya tham kar

sard-o-shadab hawa ruk gai kohsaron ki

raushni ghaT gai do-chaar ghaDi taron ki

tha nigahban-e-watan dabdaba-e-am tera

na digen panw pe tha qaum ko paigham

dil raqibon ke larazte the ye tha kaam tera

nind se chaunk paDe sun jo liya nam tera

yaad kar ke tujhe mazlum-e-watan roenge

banda-e-rasm-e-jafa chain se ab soenge

zindagi teri bahaar chamanistan-e-wafa

aabru tere liye qaum se paiman-e-wafa

aashiq-e-nam-e-watan kushta-e-arman-e-wafa

mard-e-maidan-e-wafa jism-e-wafa jaan-e-wafa

ho gai nazr-e-watan hasti-e-fani teri

na to piri rahi teri na jawani teri

auj-e-himmat pe raha teri wafa ka KHurshed

maut ke KHauf pe ghaalib rahi KHidmat ki umed

ban gaya qaid ka farman bhi rahat ki nawed

hue tariki-e-zindan mein tere baal saped

phir raha hai meri nazron mein sarapa tera

aah-o-qaid-e-sitam aur buDhapa tera

moajiza ashk-e-mohabbat ka dikhaya tu ne

ek qatra se ye tufan uThaya tu ne

mulk ko hasti-e-bedar banaya tu ne

jazba-e-qaum ko jadu ko jagaya tu ne

ek taDap aa gai sote hue armanon mein

bijliyan kaund gain qaum ke viranon mein

lash ko teri sanwaren na rafiqan-e-kuhan

ho jabin ke liye sandal ki jagah KHak-e-watan

tar hua hai jo shahidon ke lahu se daman

den usi ka tujhe punjab ke mazlum kafan

shor-e-matam na ho jhankar ho zanjiron ki

chahiye qaum ke bhisham ko chita tiron ki