mashrab

kyuuñ kahiye kisī se ki hameñ koī pilā.e

qismat meñ agar mai nahīñ mil jā.egī chaa.e

sahbā na ho shabnam sahī chaa.e ho ki zahrāb

shai bas vahī jo ġham-zada ke ġham ko bhulā.e

piine kā salīqa ho to be-mol bhī pī leñ

vīrāna bhī ho kaif-gah sahrā bhī sarā.e

saaqī ko hai be-jumbish-e-lab tishna-labī shaaq

kyuuñ sāqī-garī ke koī yuuñ naaz uThā.e

hai kaun ba-juz tere ai saaqī jo sambhāle

jab shiddat-e-nashsha tire rindoñ ko girā.e

mai-noshī bhī hai ma.arka-ārā.ī kā ik aks

bātil se jo Takrā na sake shīshoñ ko Takrā.e

mastī sahī lekin hai balā-ḳhairgī-e-josh

paimāna kī āġhosh se jo mai ko uḌaa.e

āḳhir kise andāza ḳhumār-e-shab-e-dī kā

ab mai-kada vīrāñ paḌā mai hai kahāñ aa.e

haañ taash ke pattoñ meñ kuchh ahbāb to mashġhūl

jo muntashir-e-yād ho dil kaise bhulā.e

kyun kahiye kisi se ki hamein koi pilae

qismat mein agar mai nahin mil jaegi chae

sahba na ho shabnam sahi chae ho ki zahrab

shai bas wahi jo gham-zada ke gham ko bhulae

pine ka saliqa ho to be-mol bhi pi len

virana bhi ho kaif-gah sahra bhi sarae

saqi ko hai be-jumbish-e-lab tishna-labi shaq

kyun saqi-gari ke koi yun naz uThae

hai kaun ba-juz tere ai saqi jo sambhaale

jab shiddat-e-nashsha tere rindon ko girae

mai-noshi bhi hai marka-arai ka ek aks

baatil se jo Takra na sake shishon ko Takrae

masti sahi lekin hai bala-KHairgi-e-josh

paimana ki aaghosh se jo mai ko uDae

aaKHir kise andaza KHumar-e-shab-e-di ka

ab mai-kada viran paDa mai hai kahan aae

han tash ke patton mein kuchh ahbab to mashghul

jo muntashir-e-yaad ho dil kaise bhulae