mashriq haar gaya

'kipling' ne kahā thā

''mashriq mashriq hai

aur maġhrib maġhrib hai

aur donoñ kā milnā nā-mumkin hai''

lekin maġhrib mashriq ke ghar-āñgan meñ aa pahuñchā hai

merā naukar b.b.c se ḳhabreñ suntā hai

maiñ 'be-dil' aur 'hāfiz' ke bajā.e

'shakespeare' aur 'rilke' kī bāteñ kartā huuñ

aḳhbāroñ meñ

maġhrib ke chakloñ kī ḳhabreñ aur tasvīreñ chhaptī haiñ

mujh ko chuggī dāḌhī vaale 'akbar' kī khisyānī hañsī par

.....rahm aatā hai

iqbāl kī bāteñ (gustāḳhī hotī hai)

majzūb kī baḌ haiñ

'vāris-shāh' aur 'bullhe-shāh' aur 'bābā-farīd'?

chaliye jaane diije in bātoñ meñ kyā rakkhā hai

mashriq haar gayā hai!

ye 'baksar' aur 'palāsī' kī haar nahīñ hai

'Tīpū' aur jhāñsī-kī-rānī kī haar nahīñ hai

san-sattavan kī jañg-e-āzādī kī haar nahīñ hai

aisī haar to jiitī jā saktī hai (shāyad ham ne jiit bhī lī hai)

lekin mashriq apnī ruuh ke andar haar gayā hai

qubla-ḳhān tum haar ga.e ho!

aur tumhāre TukḌoñ par palne vaalā lālchī mārko-polo

.....jiit gayā hai

akbar-e-āzam! tum ko maġhrib kī jis ayyāra ne tohfe bheje the

aur baḌā bhaa.ī likkhā thā

us ke kutte bhī in logoñ se afzal haiñ

jo tumheñ mahā-balī aur zillullāh kahā karte the

mashriq kyā thaa?

jism se uupar uThne kī ik ḳhvāhish thī

shahvat aur jibillat kī tārīkī meñ

ik diyā jalāne kī koshish thii!

maiñ soch rahā huuñ, sūraj mashriq se niklā thā

(mashriq se jaane kitne sūraj nikle the)

lekin maġhrib har sūraj ko nigal gayā hai

''maiñ haar gayā hūñ''

maiñ ne apne ghar kī dīvāroñ par likkhā hai

''maiñ haar gayā hūñ''

maiñ ne apne ā.īñe par kālak mal dī hai

aur tasvīroñ par thūkā hai

hārne vaale chehre aise hote haiñ

merī ruuh ke andar ik aisā gahrā zaḳhm lagā hai

jis ke bharne ke liye sadiyāñ bhī nā-kāfī haiñ

maiñ apne bachche aur kutte donoñ ko 'Tīpū' kahtā huuñ

mujh se merā sab kuchh le lo

aur mujhe ik nafrat de do

mujh se merā sab kuchh le lo

aur mujhe ik ġhussa de do

aisī nafrat aisā ġhussa

jis kī aag meñ sab jal jaa.eñ

.....maiñ bhī!!

'kipling' ne kaha tha

mashriq mashriq hai

aur maghrib maghrib hai

aur donon ka milna na-mumkin hai

lekin maghrib mashriq ke ghar-angan mein aa pahuncha hai

mera naukar bbc se KHabren sunta hai

main 'be-dil' aur 'hafiz' ke bajae

'shakespeare' aur 'rilke' ki baaten karta hun

aKHbaron mein

maghrib ke chaklon ki KHabren aur taswiren chhapti hain

mujh ko chuggi daDhi wale 'akbar' ki khisyani hansi par

rahm aata hai

iqbaal ki baaten (gustaKHi hoti hai)

majzub ki baD hain

'waris-shah' aur 'bullhe-shah' aur 'baba-farid'?

chaliye jaane dije in baaton mein kya rakkha hai

mashriq haar gaya hai!

ye 'baksar' aur 'palasi' ki haar nahin hai

'Tipu' aur jhansi-ki-rani ki haar nahin hai

san-sattawan ki jang-e-azadi ki haar nahin hai

aisi haar to jiti ja sakti hai (shayad hum ne jit bhi li hai)

lekin mashriq apni ruh ke andar haar gaya hai

qubla-KHan tum haar gae ho!

aur tumhaare TukDon par palne wala lalchi marko-polo

jit gaya hai

akbar-e-azam! tum ko maghrib ki jis ayyara ne tohfe bheje the

aur baDa bhai likkha tha

us ke kutte bhi in logon se afzal hain

jo tumhein maha-bali aur zillullah kaha karte the

mashriq kya tha?

jism se upar uThne ki ek KHwahish thi

shahwat aur jibillat ki tariki mein

ek diya jalane ki koshish thi!

main soch raha hun, suraj mashriq se nikla tha

(mashriq se jaane kitne suraj nikle the)

lekin maghrib har suraj ko nigal gaya hai

main haar gaya hun

main ne apne ghar ki diwaron par likkha hai

main haar gaya hun

main ne apne aaine par kalak mal di hai

aur taswiron par thuka hai

haarne wale chehre aise hote hain

meri ruh ke andar ek aisa gahra zaKHm laga hai

jis ke bharne ke liye sadiyan bhi na-kafi hain

main apne bachche aur kutte donon ko 'Tipu' kahta hun

mujh se mera sab kuchh le lo

aur mujhe ek nafrat de do

mujh se mera sab kuchh le lo

aur mujhe ek ghussa de do

aisi nafrat aisa ghussa

jis ki aag mein sab jal jaen

main bhi!!