mashwara

sub.h so kar jo uTho

chaa.e piyo aur phir aḳhbār paḌho

amn kī saf.ha-e-avval pe likhī haiñ bāteñ

chand lafzoñ kī hasīñ sauġhāteñ

qatl honā thā jinheñ vo to sabhī qatl hue

aur jo bach ga.e jo zinda rahe qismat se

ek din un ko bhī marnā hogā

isī raste se guzarnā hogā

din meñ masrūf raho

peT kī aag bujhāne ke liye

kaam daftar meñ karo

sar ko filoñ meñ khapāo

apne afsar se Daro

shaam kā vaqt kisī dost ke saath

chaa.e ḳhāne meñ bitāo

tabsira gardish-e-daurāñ pe karo

jā.eza vaqt kā lo aur kathā apnī sunāo

raat ghar lauTo to jiine key duā.eñ māñgo

raat kyā jāniye kyā dikhlā.e

tum jo bach jaao to ghar jal jaa.e

subh so kar jo uTho

chae piyo aur phir aKHbar paDho

amn ki safha-e-awwal pe likhi hain baaten

chand lafzon ki hasin saughaten

qatl hona tha jinhen wo to sabhi qatl hue

aur jo bach gae jo zinda rahe qismat se

ek din un ko bhi marna hoga

isi raste se guzarna hoga

din mein masruf raho

peT ki aag bujhane ke liye

kaam daftar mein karo

sar ko filon mein khapao

apne afsar se Daro

sham ka waqt kisi dost ke sath

chae KHane mein bitao

tabsira gardish-e-dauran pe karo

jaeza waqt ka lo aur katha apni sunao

raat ghar lauTo to jine key duaen mango

raat kya jaaniye kya dikhlae

tum jo bach jao to ghar jal jae