masjid-e-ahmarin

maiñ masjid-e-ahmarīñ ke dāman pe sabt patthar

navāh-e-hairat-kada tilismāt-e-āfiyat thā

na merā fikr-o-nazar se rishta na merā īhām-goī sheva

faqat maiñ shāhid ibādatoñ se chamakte lamhoñ kī dāstāñ kā

darūn-e-masjid khaḌe manāre azaan dete

to vādī-e-ishq se tulūa namāz hotī

imaam aur muqtadī safīrān-e-ahl-e-īmāñ

huzūr-yābī kī nudratoñ se kalām karte salām karte

maiñ masjid-e-ahmarīñ ke dāman pe sabt patthar

gavāh-e-avval gavāh-e-āḳhir huuñ us ḳhajil lamha-e-qafas kā

jab ā.inoñ kī ragoñ meñ taaza lahū kī hairat

kā ḳhuuñ huā thā

ajab tulūa sahar huī thī

falak kī surḳhī utar ke chashm-e-tapāñ meñ aa.ī

chahār samtoñ meñ ḳhandaqeñ thiiñ

fazā meñ raqsāñ thī bū-e-vahshat

darūn-e-masjid bhī kalma-go the

vo kalma-go the ki jin ke hāthoñ meñ aslaha thā

chahār jānib gharoñ meñ qaidī the

jin ke hoñToñ se bad-duā.eñ phisal rahī thiiñ

maiñ qalb-e-shahr-e-salām andar

nam-o-tabassum se āshnā thā magar ye din the

ḳhajil fasānoñ kī bāzyābī kī sūratoñ ke

safīr aate safīr jaate bilakte bachchoñ kī āh-o-zārī

nahīf lahjoñ kī kapkapāhaT samā.atoñ se ulajh rahī thī

fazā meñ thā ḳhauf dhund jaise

darūn-e-masjid vo ahal-e-mimbar vo ahl-e-jubba

sifāratoñ kī sabīl-e-maḳhlūt meñ ulajh kar

sirāt-e-abyaz se haT ga.e the

maiñ Dar gayā thā maiñ masjid-e-ahmarīñ ke dāman pe sabt patthar

maiñ īstāda huuñ ab bhī lekin

na masjid-e-ahmarīñ hai vaisī na muqtadī haiñ na tifl-o-mādar

na ahl-e-mimbar haiñ jin kī taqrīr ne fazāoñ kā saañs khīñchā

na shorisheñ shahr-e-kalma-go meñ

magar haqīqat meñ kyā huā thā

lahū maiñ luthḌī safoñ se pūchho

chaman meñ murda sifāratoñ kī shabīheñ dekho

maiñ masjid-e-ahmarīñ ke dāman pe sabt patthar

ka.ī zamānoñ se ro rahā huuñ

mujhe basārat nahīñ basīrat se dekhiyegā

main masjid-e-ahmarin ke daman pe sabt patthar

nawah-e-hairat-kada tilismat-e-afiyat tha

na mera fikr-o-nazar se rishta na mera iham-goi shewa

faqat main shahid ibaadaton se chamakte lamhon ki dastan ka

darun-e-masjid khaDe manare azan dete

to wadi-e-ishq se tulua namaz hoti

imam aur muqtadi safiran-e-ahl-e-iman

huzur-yabi ki nudraton se kalam karte salam karte

main masjid-e-ahmarin ke daman pe sabt patthar

gawah-e-awwal gawah-e-aKHir hun us KHajil lamha-e-qafas ka

jab aainon ki ragon mein taza lahu ki hairat

ka KHun hua tha

ajab tulua sahar hui thi

falak ki surKHi utar ke chashm-e-tapan mein aai

chahaar samton mein KHandaqen thin

faza mein raqsan thi bu-e-wahshat

darun-e-masjid bhi kalma-go the

wo kalma-go the ki jin ke hathon mein aslaha tha

chahaar jaanib gharon mein qaidi the

jin ke honTon se bad-duaen phisal rahi thin

main qalb-e-shahr-e-salam andar

nam-o-tabassum se aashna tha magar ye din the

KHajil fasanon ki bazyabi ki suraton ke

safir aate safir jate bilakte bachchon ki aah-o-zari

nahif lahjon ki kapkapahaT samaaton se ulajh rahi thi

faza mein tha KHauf dhund jaise

darun-e-masjid wo ahal-e-mimbar wo ahl-e-jubba

sifaraton ki sabil-e-maKHlut mein ulajh kar

siraat-e-abyaz se haT gae the

main Dar gaya tha main masjid-e-ahmarin ke daman pe sabt patthar

main istada hun ab bhi lekin

na masjid-e-ahmarin hai waisi na muqtadi hain na tifl-o-madar

na ahl-e-mimbar hain jin ki taqrir ne fazaon ka sans khincha

na shorishen shahr-e-kalma-go mein

magar haqiqat mein kya hua tha

lahu main luthDi safon se puchho

chaman mein murda sifaraton ki shabihen dekho

main masjid-e-ahmarin ke daman pe sabt patthar

kai zamanon se ro raha hun

mujhe basarat nahin basirat se dekhiyega