masjid-e-qurtuba

silsila-e-roz-o-shab naqsh-gar-e-hādsāt

silsila-e-roz-o-shab asl-e-hayāt-o-mamāt

silsila-e-roz-o-shab tār-e-harīr-e-do-rañg

jis se banātī hai zaat apnī qabā-e-sifāt

silsila-e-roz-o-shab sāz-e-azal kī fuġhāñ

jis se dikhātī hai zaat zer-o-bam-e-mumkināt

tujh ko parakhtā hai ye mujh ko parakhtā hai ye

silsila-e-roz-o-shab sairafi-e-kā.enāt

tū ho agar kam ayaar maiñ huuñ agar kam ayaar

maut hai terī barāt maut hai merī barāt

tere shab-o-roz kī aur haqīqat hai kyā

ek zamāne kī rau jis meñ na din hai na raat

āni-o-fānī tamām mojaza-hā-e-hunar

kār-e-jahāñ be-sabāt kār-e-jahāñ be-sabāt

avval o āḳhir fanā bātin o zāhir fanā

naqsh-e-kuhan ho ki nau manzil-e-āḳhir fanā

hai magar is naqsh meñ rañg-e-sabāt-e-davām

jis ko kiyā ho kisī mard-e-ḳhudā ne tamām

mard-e-ḳhudā kā amal ishq se sāhab faroġh

ishq hai asl-e-hayāt maut hai us par harām

tund o subuk-sair hai garche zamāne kī rau

ishq ḳhud ik sail hai sail ko letā hai thaam

ishq kī taqvīm meñ asr-e-ravāñ ke sivā

aur zamāne bhī haiñ jin kā nahīñ koī naam

ishq dam-e-jibra.īl ishq dil-e-mustafā

ishq ḳhudā kā rasūl ishq ḳhudā kā kalām

ishq kī mastī se hai paikar-e-gil tābnāk

ishq hai sahbā-e-ḳhām ishq hai kās-ul-karām

ishq faqīh-e-haram ishq amīr-e-junūud

ishq hai ibnus-sabīl is ke hazāroñ maqām

ishq ke mizrāb se naġhma-e-tār-e-hayāt

ishq se nūr-e-hayāt ishq se nār-e-hayāt

ai haram-e-qurtuba ishq se terā vajūd

ishq sarāpā davām jis meñ nahīñ raft o buud

rañg ho yā ḳhisht o sañg chañg ho yā harf o saut

mojaza-e-fan kī hai ḳhūn-e-jigar se numūd

qatra-e-ḳhūn-e-jigar sil ko banātā hai dil

ḳhūn-e-jigar se sadā soz o surūr o surūd

terī fazā dil-faroz merī navā sīna-soz

tujh se diloñ kā huzūr mujh se diloñ kī kushūd

arsh-e-mo.allā se kam sīna-e-ādam nahīñ

garche kaf-e-ḳhāk kī had hai sip.har-e-kabūd

paikar-e-nūrī ko hai sajda mayassar to kyā

us ko mayassar nahīñ soz-o-gudāz-e-sajūd

kāfir-e-hindi huuñ maiñ dekh mirā zauq o shauq

dil meñ salāt o durūd lab pe salāt o durūd

shauq mirī lai meñ hai shauq mirī nai meñ hai

naġhma-e-allāh-hū mere rag-o-pai meñ hai

terā jalāl o jamāl mard-e-ḳhudā kī dalīl

vo bhī jalīl o jamīl tū bhī jalīl o jamīl

terī binā pā.edār tere sutūñ be-shumār

shaam ke sahrā meñ ho jaise hujūm-e-nuḳhīl

tere dar-o-bām par vādī-e-aiman kā nuur

terā minār-e-buland jalva-gah-e-jibra.īl

miT nahīñ saktā kabhī mard-e-musalmāñ ki hai

us kī azānoñ se faash sirr-e-kalīm-o-ḳhalīl

us kī zamīñ be-hudūd us kā ufuq be-saġhūr

us ke samundar kī mauj dajla o danyūb o niil

us ke zamāne ajiib us ke fasāne ġharīb

ahd-e-kuhan ko diyā us ne payām-e-rahīl

sāqi-e-rabāb-e-zauq fāras-e-maidān-e-shauq

baada hai us kā rahīq teġh hai us kī asiil

mard-e-sipāhī hai vo us kī zirah lā-ilāh

sāya-e-shamshīr meñ us kī panah lā-ilāh

tujh se huā āshkār banda-e-momin kā raaz

us ke dinoñ kī tapish us kī shaboñ kā gudāz

us kā maqām-e-buland us kā ḳhayāl-e-azīm

us kā surūr us kā shauq us kā niyāz us kā naaz

haath hai allāh kā banda-e-momin kā haath

ġhālib o kār-āfrīñ kār-kushā kārsāz

ḳhākī o nūrī-nihād banda-e-maulā-sifāt

har do-jahāñ se ġhanī us kā dil-e-be-niyāz

us kī umīdeñ qalīl us ke maqāsid jalīl

us kī adā dil-fareb us kī nigah dil-navāz

aaj bhī is des meñ aam hai chashm-e-ġhazāl

aur nigāhoñ ke tiir aaj bhī haiñ dil-nashīñ

bū-e-yaman aaj bhī us kī havāoñ meñ hai

rañg-e-hijāz aaj bhī us kī navāoñ meñ hai

dīda-e-anjum meñ hai terī zamīñ āsmāñ

aah ki sadiyoñ se hai terī fazā be-azāñ

kaun sī vaadī meñ hai kaun sī manzil meñ hai

ishq-e-balā-ḳhez kā qāfla-e-saḳht-jāñ

dekh chukā almanī shorish-e-islāh-e-dīñ

jis ne na chhoḌe kahīñ naqsh-e-kuhan ke nishāñ

harf-e-ġhalat ban ga.ī ismat-e-pīr-e-kunisht

aur huī fikr kī kashti-e-nāzuk ravāñ

chashm-e-farānsīs bhī dekh chukī inqalāb

jis se digar-gūñ huā maġhrabiyoñ kā jahāñ

millat-e-rūmī-nizhād kohna-parastī se piir

lazzat-e-tajdīda se vo bhī huī phir javāñ

rūh-e-musalmāñ meñ hai aaj vahī iztirāb

rāz-e-ḳhudā.ī hai ye kah nahīñ saktī zabāñ

narm dam-e-guftugū garm dam-e-justujū

razm ho yā bazm ho pāk-dil o pāk-bāz

nuqta-e-parkār-e-haq mard-e-ḳhudā kā yaqīñ

aur ye aalam tamām vahm o tilism o majāz

aql kī manzil hai vo ishq kā hāsil hai vo

halqa-e-āfāq meñ garmi-e-mahfil hai vo

kāba-e-arbāb-e-fan satvat-e-dīn-e-mubīñ

tujh se haram martabat undulusiyoñ kī zamīñ

hai tah-e-gardūñ agar husn meñ terī nazīr

qalb-e-musalmāñ meñ hai aur nahīñ hai kahīñ

aah vo mardān-e-haq vo arabī shahsavār

hāmil-e-ḳhalq-e-azīm sāhab-e-sidq-o-yaqīñ

jin kī hukūmat se hai faash ye ramz-e-ġharīb

saltanat-e-ahl-e-dil faqr hai shāhī nahīñ

jin kī nigāhoñ ne kī tarbiyat-e-sharq-o-ġharb

zulmat-e-europe meñ thī jin kī ḳhirad-rāh-bīñ

jin ke lahū ke tufail aaj bhī haiñ undulusī

ḳhush-dil o garam-iḳhtilāt saada o raushan-jabīñ

dekhiye is bahr kī tah se uchhaltā hai kyā

gumbad-e-nīlofarī rañg badaltā hai kyā

vādi-e-koh-sār meñ ġharq-e-shafaq hai sahāb

lāl-e-badaḳhshāñ ke Dher chhoḌ gayā āftāb

saada o pur-soz hai duḳhtar-e-dahqāñ kā giit

kashtī-e-dil ke liye sail hai ahd-e-shabāb

āb-e-ravān-e-kabīr tere kināre koī

dekh rahā hai kisī aur zamāne kā ḳhvāb

ālam-e-nau hai abhī parda-e-taqdīr meñ

merī nigāhoñ meñ hai us kī sahar be-hijāb

parda uThā duuñ agar chehra-e-afkār se

lā na sakegā farañg merī navāoñ kī taab

jis meñ na ho inqalāb maut hai vo zindagī

rūh-e-umam kī hayāt kashmakash-e-inqilāb

sūrat-e-shamshīr hai dast-e-qazā meñ vo qaum

kartī hai jo har zamāñ apne amal kā hisāb

naqsh haiñ sab nā-tamām ḳhūn-e-jigar ke baġhair

naġhma hai saudā-e-ḳhām ḳhūn-e-jigar ke baġhair

silsila-e-roz-o-shab naqsh-gar-e-hadsat

silsila-e-roz-o-shab asl-e-hayat-o-mamat

silsila-e-roz-o-shab tar-e-harir-e-do-rang

jis se banati hai zat apni qaba-e-sifat

silsila-e-roz-o-shab saz-e-azal ki fughan

jis se dikhati hai zat zer-o-bam-e-mumkinat

tujh ko parakhta hai ye mujh ko parakhta hai ye

silsila-e-roz-o-shab sairafi-e-kaenat

tu ho agar kam ayar main hun agar kam ayar

maut hai teri baraat maut hai meri baraat

tere shab-o-roz ki aur haqiqat hai kya

ek zamane ki rau jis mein na din hai na raat

aani-o-fani tamam mojaza-ha-e-hunar

kar-e-jahan be-sabaat kar-e-jahan be-sabaat

awwal o aaKHir fana baatin o zahir fana

naqsh-e-kuhan ho ki nau manzil-e-aKHir fana

hai magar is naqsh mein rang-e-sabaat-e-dawam

jis ko kiya ho kisi mard-e-KHuda ne tamam

mard-e-KHuda ka amal ishq se sahab farogh

ishq hai asl-e-hayat maut hai us par haram

tund o subuk-sair hai garche zamane ki rau

ishq KHud ek sail hai sail ko leta hai tham

ishq ki taqwim mein asr-e-rawan ke siwa

aur zamane bhi hain jin ka nahin koi nam

ishq dam-e-jibrail ishq dil-e-mustafa

ishq KHuda ka rasul ishq KHuda ka kalam

ishq ki masti se hai paikar-e-gil tabnak

ishq hai sahba-e-KHam ishq hai kas-ul-karam

ishq faqih-e-haram ishq amir-e-junuud

ishq hai ibnus-sabil is ke hazaron maqam

ishq ke mizrab se naghma-e-tar-e-hayat

ishq se nur-e-hayat ishq se nar-e-hayat

ai haram-e-qurtuba ishq se tera wajud

ishq sarapa dawam jis mein nahin raft o bud

rang ho ya KHisht o sang chang ho ya harf o saut

mojaza-e-fan ki hai KHun-e-jigar se numud

qatra-e-KHun-e-jigar sil ko banata hai dil

KHun-e-jigar se sada soz o surur o surud

teri faza dil-faroz meri nawa sina-soz

tujh se dilon ka huzur mujh se dilon ki kushud

arsh-e-moalla se kam sina-e-adam nahin

garche kaf-e-KHak ki had hai siphar-e-kabud

paikar-e-nuri ko hai sajda mayassar to kya

us ko mayassar nahin soz-o-gudaz-e-sajud

kafir-e-hindi hun main dekh mera zauq o shauq

dil mein salat o durud lab pe salat o durud

shauq meri lai mein hai shauq meri nai mein hai

naghma-e-allah-hu mere rag-o-pai mein hai

tera jalal o jamal mard-e-KHuda ki dalil

wo bhi jalil o jamil tu bhi jalil o jamil

teri bina paedar tere sutun be-shumar

sham ke sahra mein ho jaise hujum-e-nuKHil

tere dar-o-baam par wadi-e-aiman ka nur

tera minar-e-buland jalwa-gah-e-jibrail

miT nahin sakta kabhi mard-e-musalman ki hai

us ki azanon se fash sirr-e-kalim-o-KHalil

us ki zamin be-hudud us ka ufuq be-saghur

us ke samundar ki mauj dajla o danyub o nil

us ke zamane ajib us ke fasane gharib

ahd-e-kuhan ko diya us ne payam-e-rahil

saqi-e-rabab-e-zauq faras-e-maidan-e-shauq

baada hai us ka rahiq tegh hai us ki asil

mard-e-sipahi hai wo us ki zirah la-ilah

saya-e-shamshir mein us ki panah la-ilah

tujh se hua aashkar banda-e-momin ka raaz

us ke dinon ki tapish us ki shabon ka gudaz

us ka maqam-e-buland us ka KHayal-e-azim

us ka surur us ka shauq us ka niyaz us ka naz

hath hai allah ka banda-e-momin ka hath

ghaalib o kar-afrin kar-kusha karsaz

KHaki o nuri-nihad banda-e-maula-sifat

har do-jahan se ghani us ka dil-e-be-niyaz

us ki umiden qalil us ke maqasid jalil

us ki ada dil-fareb us ki nigah dil-nawaz

aaj bhi is des mein aam hai chashm-e-ghazal

aur nigahon ke tir aaj bhi hain dil-nashin

bu-e-yaman aaj bhi us ki hawaon mein hai

rang-e-hijaz aaj bhi us ki nawaon mein hai

dida-e-anjum mein hai teri zamin aasman

aah ki sadiyon se hai teri faza be-azan

kaun si wadi mein hai kaun si manzil mein hai

ishq-e-bala-KHez ka qafla-e-saKHt-jaan

dekh chuka almani shorish-e-islah-e-din

jis ne na chhoDe kahin naqsh-e-kuhan ke nishan

harf-e-ghalat ban gai ismat-e-pir-e-kunisht

aur hui fikr ki kashti-e-nazuk rawan

chashm-e-faransis bhi dekh chuki inqalab

jis se digar-gun hua maghrabiyon ka jahan

millat-e-rumi-nizhad kohna-parasti se pir

lazzat-e-tajdida se wo bhi hui phir jawan

ruh-e-musalman mein hai aaj wahi iztirab

raaz-e-KHudai hai ye kah nahin sakti zaban

narm dam-e-guftugu garm dam-e-justuju

razm ho ya bazm ho pak-dil o pak-baz

nuqta-e-parkar-e-haq mard-e-KHuda ka yaqin

aur ye aalam tamam wahm o tilism o majaz

aql ki manzil hai wo ishq ka hasil hai wo

halqa-e-afaq mein garmi-e-mahfil hai wo

kaba-e-arbab-e-fan satwat-e-din-e-mubin

tujh se haram martabat undulusiyon ki zamin

hai tah-e-gardun agar husn mein teri nazir

qalb-e-musalman mein hai aur nahin hai kahin

aah wo mardan-e-haq wo arabi shahsawar

hamil-e-KHalq-e-azim sahab-e-sidq-o-yaqin

jin ki hukumat se hai fash ye ramz-e-gharib

saltanat-e-ahl-e-dil faqr hai shahi nahin

jin ki nigahon ne ki tarbiyat-e-sharq-o-gharb

zulmat-e-europe mein thi jin ki KHirad-rah-bin

jin ke lahu ke tufail aaj bhi hain undulusi

KHush-dil o garam-iKHtilat sada o raushan-jabin

dekhiye is bahr ki tah se uchhalta hai kya

gumbad-e-nilofari rang badalta hai kya

wadi-e-koh-sar mein gharq-e-shafaq hai sahab

lal-e-badaKHshan ke Dher chhoD gaya aaftab

sada o pur-soz hai duKHtar-e-dahqan ka git

kashti-e-dil ke liye sail hai ahd-e-shabab

aab-e-rawan-e-kabir tere kinare koi

dekh raha hai kisi aur zamane ka KHwab

aalam-e-nau hai abhi parda-e-taqdir mein

meri nigahon mein hai us ki sahar be-hijab

parda uTha dun agar chehra-e-afkar se

la na sakega farang meri nawaon ki tab

jis mein na ho inqalab maut hai wo zindagi

ruh-e-umam ki hayat kashmakash-e-inqilab

surat-e-shamshir hai dast-e-qaza mein wo qaum

karti hai jo har zaman apne amal ka hisab

naqsh hain sab na-tamam KHun-e-jigar ke baghair

naghma hai sauda-e-KHam KHun-e-jigar ke baghair