masnawi kya hai

lafz masnā se ye jo miyāñ hai banī

do ke ma.anī ko zāhir kare masnavī

ḳhuub arabī meñ aur fārsī meñ chalī

aa ke urdu meñ bhī ḳhuub phūlī-phalī

mauzūñ paa.ī ga.ī dāstāñ ke liye

ye munāsib hai nazm-e-ravāñ ke liye

sīdhī saadī hai jo masnavī kī zabāñ

hai 'hasan' miir kī ḳhuub sehrul-bayāñ

is meñ tahzīb kā aks dekho miyāñ

miltā hai jā-ba-jā ik samājī bayāñ

shaiḳh 'rūmī' jo guzre haiñ ik maulvī

un kī duniyā meñ mash.hūr hai masnavī

masnavī ke bhī maḳhsūs auzān haiñ

jo ġhazal kī tarah bachcho āsān haiñ

'hāfiz' is kī fazā ko banāte raho

bachchoñ ko masnavī tum paḌhāte raho

lafz masna se ye jo miyan hai bani

do ke mani ko zahir kare masnawi

KHub arabi mein aur farsi mein chali

aa ke urdu mein bhi KHub phuli-phali

mauzun pai gai dastan ke liye

ye munasib hai nazm-e-rawan ke liye

sidhi sadi hai jo masnawi ki zaban

hai 'hasan' mir ki KHub sehrul-bayan

is mein tahzib ka aks dekho miyan

milta hai ja-ba-ja ek samaji bayan

shaiKH 'rumi' jo guzre hain ek maulwi

un ki duniya mein mashhur hai masnawi

masnawi ke bhi maKHsus auzan hain

jo ghazal ki tarah bachcho aasan hain

'hafiz' is ki faza ko banate raho

bachchon ko masnawi tum paDhate raho