mata-e-raegan

ye dard-e-zindagī kis kī amānat hai kise de duuñ

koī vāris nahīñ is kā matā-e-rā.egāñ hai ye

masīhā ab na ā.eñge yahī nashtar rag-e-jāñ meñ

ḳhalish bantā rahegā merī sāñsoñ meñ nihāñ hai ye

ḳhudāyā ham se pahle log bhī jo is zamīñ par the

yūñhī pāmāl hote the, jo is ke ba.ad ā.eñge

umīd-e-sub.h ke ḳhanjar se zaḳhmī ho ke jā.eñge?

(kahāñ jā kar rukegā qāfila in sogvāroñ kaa)

ye phir bhī tere bande haiñ tirī hī hamd gā.eñge

inheñ āñkheñ to de dī haiñ basārat bhī inheñ de de

tujhe sab DhūñDte haiñ is tarah andhe haiñ sab jaise

isī kore varaq par kuchh ibārat bhī unheñ de de

khaḌā hai muñh kiye mashriq kī jānib, koī maġhrib kī

(mirī tasvīr meñ in chīḳhte rañgoñ kī aisī kyā zarūrat thii)

ḳhudāyā baḳhsh de in be-gunāhoñ ke gunāhoñ ko

ye ma.anī DhūñDte haiñ kashmakash meñ raat aur din kī

haqīqat ko samajhnā chāhte haiñ saal aur sin kī

ye sab majbūr haiñ in par dar-e-tauba khulā rakhnā

ye duniyā ḳhauf aur lālach pe jis kī niiv rakkhī hai

isī miTTī se phūTe haiñ isī dhartī ke paale haiñ

ujālā bhī yahī haiñ is zamīñ kā aur añdherā bhī

yahī shahkār haiñ terā yahī paañv ke chhāle haiñ

(ye sab ke sab libās-e-fāḳhira meñ mailī bheḌeñ haiñ)

ilāh-al-ālamīñ in kī ḳhatā se dar-guzar karnā

bahut māzūr haiñ ye ḳhud-nigar apnī jibillat se

muqaddar in kā hai shaam o sahar ko roz sar karnā

masā.ī in kī sīm-o-zar ke Dheroñ meñ badal denā

tire paas aa.eñ, motī ke mahl mehnat kā phal denā

ye dard-e-zindagi kis ki amanat hai kise de dun

koi waris nahin is ka mata-e-raegan hai ye

masiha ab na aaenge yahi nashtar rag-e-jaan mein

KHalish banta rahega meri sanson mein nihan hai ye

KHudaya hum se pahle log bhi jo is zamin par the

yunhi pamal hote the, jo is ke baad aaenge

umid-e-subh ke KHanjar se zaKHmi ho ke jaenge?

(kahan ja kar rukega qafila in sogwaron ka)

ye phir bhi tere bande hain teri hi hamd gaenge

inhen aankhen to de di hain basarat bhi inhen de de

tujhe sab DhunDte hain is tarah andhe hain sab jaise

isi kore waraq par kuchh ibarat bhi unhen de de

khaDa hai munh kiye mashriq ki jaanib, koi maghrib ki

(miri taswir mein in chiKHte rangon ki aisi kya zarurat thi)

KHudaya baKHsh de in be-gunahon ke gunahon ko

ye mani DhunDte hain kashmakash mein raat aur din ki

haqiqat ko samajhna chahte hain sal aur sin ki

ye sab majbur hain in par dar-e-tauba khula rakhna

ye duniya KHauf aur lalach pe jis ki niw rakkhi hai

isi miTTi se phuTe hain isi dharti ke pale hain

ujala bhi yahi hain is zamin ka aur andhera bhi

yahi shahkar hain tera yahi panw ke chhaale hain

(ye sab ke sab libas-e-faKHira mein maili bheDen hain)

ilah-al-alamin in ki KHata se dar-guzar karna

bahut mazur hain ye KHud-nigar apni jibillat se

muqaddar in ka hai sham o sahar ko roz sar karna

masai in ki sim-o-zar ke Dheron mein badal dena

tere pas aaen, moti ke mahl mehnat ka phal dena