mauhum afsane

vo afsāne kiyā hai chāñd tāroñ kā safar jin meñ

ye duniyā ek dhundlī geñd aatī hai nazar jin meñ

vo jin meñ mulk-e-barq-o-bād tak tasḳhīr hotā hai

jahāñ ik shab meñ sone kā mahal tāmīr hotā hai

achhūte-sāhiloñ ke vo sahar-ālūd vīrāne

tilismī-qasr meñ gumnām shahzādī ke afsāne

vo afsāne jo rāteñ chāñd ke barbat pe gaatī haiñ

vo afsāne jo sub.heñ ruuh ke andar jagātī haiñ

fazā kartī hai jin mauhūm afsānoñ kī tāmīreñ

bhaTakte abr meñ jin kī milīñ mub.ham sī tasvīreñ

sar-e-sāhil jo bahtī sham.a kī lau gungunātī hai

dimāġh o dil meñ jin se ik kiran sī dauḌ jaatī hai

vo afsāne jo dil ko be-kahe mahsūs hote haiñ

jo hoñToñ kī hasīñ gulnār mehrāboñ meñ sote haiñ

kisī kī nargis-e-sharsār ke mub.ham se afsāne

kisī kī zulf-e-ambar-bār ke barham se afsāne

vo jin ko is tarah kuchh jumbish-e-mizhgāñ sunātī hai

ki jaise ḳhvāb meñ bhūlī huī ik yaad aatī hai

rahā huuñ gum inhī mauhūm afsānoñ kī bastī meñ

inhī dilkash magar gumnām rūmānoñ kī bastī meñ

kisī ne toḌ Daalā ye tilism-e-kaif-o-ḳhvāb āḳhir

mirī āñkhoñ ke aage aa.e shamshīr o shabāb āḳhir

wo afsane kiya hai chand taron ka safar jin mein

ye duniya ek dhundli gend aati hai nazar jin mein

wo jin mein mulk-e-barq-o-baad tak tasKHir hota hai

jahan ek shab mein sone ka mahal tamir hota hai

achhute-sahilon ke wo sahar-alud virane

tilismi-qasr mein gumnam shahzadi ke afsane

wo afsane jo raaten chand ke barbat pe gati hain

wo afsane jo subhen ruh ke andar jagati hain

faza karti hai jin mauhum afsanon ki tamiren

bhaTakte abr mein jin ki milin mubham si taswiren

sar-e-sahil jo bahti shama ki lau gungunati hai

dimagh o dil mein jin se ek kiran si dauD jati hai

wo afsane jo dil ko be-kahe mahsus hote hain

jo honTon ki hasin gulnar mehrabon mein sote hain

kisi ki nargis-e-sharsar ke mubham se afsane

kisi ki zulf-e-ambar-bar ke barham se afsane

wo jin ko is tarah kuchh jumbish-e-mizhgan sunati hai

ki jaise KHwab mein bhuli hui ek yaad aati hai

raha hun gum inhi mauhum afsanon ki basti mein

inhi dilkash magar gumnam rumanon ki basti mein

kisi ne toD Dala ye tilism-e-kaif-o-KHwab aaKHir

meri aankhon ke aage aae shamshir o shabab aaKHir