maulwiyon ka shaghl-e-takfir

ik maulvī sāhab se kahā maiñ ne ki kyā aap

kuchh hālat-e-europe se ḳhabar-dār nahīñ haiñ

āmāda-e-islām haiñ london meñ hazāroñ

har chand abhī mā.il-e-iz.hār nahīñ haiñ

taqlīd ke phandoñ se hue jaate haiñ āzād

vo log bhī jo dāḳhil-e-isrār nahīñ haiñ

jo naam se islām ke ho jaate haiñ barham

un meñ bhī ta.assub ke vo āsār nahīñ haiñ

afsos magar ye hai ki vaa.iz nahīñ paidā

yā haiñ to ba-qaul aap ke dīñ-dār nahīñ haiñ

kyā aap ke zumre meñ kisī ko nahīñ ye dard

kyā aap bhī us ke liye tayyār nahīñ haiñ

jhallā ke kahā ye ki ye kyā sū-e-adab hai

kahte ho vo bāteñ jo sazā-vār nahīñ haiñ

karte haiñ shab-o-roz musalmānoñ kī takfīr

baiThe hue kuchh ham bhī to be-kār nahīñ haiñ

ek maulwi sahab se kaha main ne ki kya aap

kuchh haalat-e-europe se KHabar-dar nahin hain

aamada-e-islam hain london mein hazaron

har chand abhi mail-e-izhaar nahin hain

taqlid ke phandon se hue jate hain aazad

wo log bhi jo daKHil-e-israr nahin hain

jo nam se islam ke ho jate hain barham

un mein bhi tassub ke wo aasar nahin hain

afsos magar ye hai ki waiz nahin paida

ya hain to ba-qaul aap ke din-dar nahin hain

kya aap ke zumre mein kisi ko nahin ye dard

kya aap bhi us ke liye tayyar nahin hain

jhalla ke kaha ye ki ye kya su-e-adab hai

kahte ho wo baaten jo saza-war nahin hain

karte hain shab-o-roz musalmanon ki takfir

baiThe hue kuchh hum bhi to be-kar nahin hain