mausam-e-barsat ki subh

aaj jis vaqt mujhe tum ne jagāyā ammāñ

apne aur niiñd ke pahlū se uThāyā ammāñ

āsmāñ kamlī thā oḌhe hue kaalī kaalī

tāzgī aur safedī se fazā thī ḳhālī

na añdherā hī thā shab kā na ujālā din kā

raat ke gird nazar aatā thā haalā din kā

ek bulandī kī kaḌak pastī ko dhuñdlātī thī

dil hilātī huī āvāz sunī jaatī thī

sub.h har chaar taraf rotī huī phirtī thī

apnā muñh āñsuoñ se dhotī huī phirtī thī

jaise nanhā sā maiñ beTā huuñ tumhārā ammāñ

aise hī sub.h kā ik laal hai pyārā ammāñ

jaise maiñ khelne jaatā huuñ bahut duur kahīñ

aise hī sharq meñ hai aaj vo mastūr kahīñ

kho gayā hai nazar aatā nahīñ bachcha us kā

DhūñDhtī laakh hai paatā nahīñ bachcha us kā

dekho to sub.h kā dil sard hai be-nūr hai aañkh

apne bachcha ke tasavvur hī se māmūr hai aañkh

mujh ko jaane do ki maiñ DhūñD ke lā.ūñ us ko

ġham-zada sub.h ke pahlū meñ biThā.ūñ us ko

aaj jis waqt mujhe tum ne jagaya amman

apne aur nind ke pahlu se uThaya amman

aasman kamli tha oDhe hue kali kali

tazgi aur safedi se faza thi KHali

na andhera hi tha shab ka na ujala din ka

raat ke gird nazar aata tha haala din ka

ek bulandi ki kaDak pasti ko dhundlati thi

dil hilati hui aawaz suni jati thi

subh har chaar taraf roti hui phirti thi

apna munh aansuon se dhoti hui phirti thi

jaise nanha sa main beTa hun tumhaara amman

aise hi subh ka ek lal hai pyara amman

jaise main khelne jata hun bahut dur kahin

aise hi sharq mein hai aaj wo mastur kahin

kho gaya hai nazar aata nahin bachcha us ka

DhunDhti lakh hai pata nahin bachcha us ka

dekho to subh ka dil sard hai be-nur hai aankh

apne bachcha ke tasawwur hi se mamur hai aankh

mujh ko jaane do ki main DhunD ke laun us ko

gham-zada subh ke pahlu mein biThaun us ko