mausam ke taza gulab

tumhārī ḳhāmoshiyoñ meñ

muskurāte haiñ mere alfāz

aur tumhāre gāloñ par khil uThte haiñ

mausam ke taaza gulāb

tumhārī nīm-bāz āñkhoñ se

phūTtā hai raushnī kā koī ābshār

jis meñ rah-rah bhīgtā hai

mere sapnoñ kā sansār

mujhe ḳhvāb pasand haiñ

tumheñ maiñ

tumheñ gulāb pasand haiñ

aur mujhe tum

mujhe sochte hue tumhārī āñkhoñ meñ

zarūr tairtī hogī

rajnigandha bela yā har-siñgār kī ḳhushbū

mujhe sochtī huī tum

yā tumheñ dekhtā huā maiñ

hamīñ haiñ shāyad jin se milne ke liye

fazāoñ meñ tairte hai rang

chaman par utartī haiñ bahāreñ

mausam kaisā bhī ho

mere lafzoñ meñ gūñjtī raheñgī tumhārī khilkhilāhaTeñ

merī āñkhoñ meñ bachī rahegī

tumhārī āñkhoñ kī lau

aur merī sāñsoñ meñ ghulī rahegī

tumhāre ghane bāloñ kī mādak gandh

hameñ pata hai ki

tumhārī bātoñ aur mere maun meñ Duubā yeh mausam

hameñ le jā.egā is sadī ke us paar

tumhaari KHamoshiyon mein

muskuraate hain mere alfaz

aur tumhaare galon par khil uThte hain

mausam ke taza gulab

tumhaari nim-baz aankhon se

phuTta hai raushni ka koi aabshaar

jis mein rah-rah bhigta hai

mere sapnon ka sansar

mujhe KHwab pasand hain

tumhein main

tumhein gulab pasand hain

aur mujhe tum

mujhe sochte hue tumhaari aankhon mein

zarur tairti hogi

rajnigandha bela ya har-singar ki KHushbu

mujhe sochti hui tum

ya tumhein dekhta hua main

hamin hain shayad jin se milne ke liye

fazaon mein tairte hai rang

chaman par utarti hain bahaaren

mausam kaisa bhi ho

mere lafzon mein gunjti rahengi tumhaari khilkhilahaTen

meri aankhon mein bachi rahegi

tumhaari aankhon ki lau

aur meri sanson mein ghuli rahegi

tumhaare ghane baalon ki madak gandh

hamein pata hai ki

tumhaari baaton aur mere maun mein Duba yeh mausam

hamein le jaega is sadi ke us par